Apuia - a hming lam a ngai leh ṭhin!
Indian Super League chu Lalengmawia Ralte (Apuia) channa niawma mawi a ni - Vaivakawn tlangval hian season ṭan thla November puala ISL Emerging Player of the Month chawimawina a dawng a, Mumbai City FC-in 4-2 a Jamshedpur FC an hnehna inkhelah a khel ṭha em em bawk.
Ningani zan khan Mumbai hian season duhawm tak hmangtu Jamshedpur chu 4-2 in an hneh a, Cassinho, Bipin Singh, Igor Angulo leh Ygor Catatau ten Mumbai club tan goal khat ṭheuh an khung - Jamshedpur tana Komal Thatal leh Eli Sabia goal khungin awmzia a nei phak lo.
Mumbai-in ISL match nga an khelh tawhah vawi li hnehna changin vawi khat chiah an la tlawm a, table chung ber an luah chhunzawm zel - Jamshedpur erawh tun season-a a vawi khat nan an tlawm thung.
Inkhel chu
Ningani zan inkhelah Mumbai tan Apuia'n inkhel bul a ṭan laiin Jamshedpur lamah Laldinliana Renthlei leh Ricky Lallawmawma ten inkhel bul an ṭan bawk a, goal khung hmasatu chu Mumbai an ni - Cassinho, Bipin Singh leh Igor Angulo te chuan minute 25 pawh a tlin hmain Mumbai tan goal an rawn khung a, Jamshedpur an insiamrem hman lo!
Chawlhlawkah Jamshedpur-in thu ṭha an ngaithla tih hriat takin second half ṭan aṭanga minute thumna lekah Komal Thatal chuan si phurh a rawn sut ṭhen a, minute sarih hnu lawkah Eli Sabia chuan a khung ve leh bawk - Men of Steel tan beiseina thar a piang.
Mahse, Mumbai-in chak loh an duh lo - minute 70-naah Brazilian forward Catatau chuan goal a rawn khung ve leh a, Jamshedpur an tho tawh lo. Hun tawp thlengin goal dang a lut tawh lo a, 4-2 in Mumbai an chak.
Apuia chawimawina
Jamshedpur lakah pawh Apuia a khel ṭha a, Mizo zinga World Cup khel hmasa ber hi midfield thununtu tia sawi ngam a ni - tun season-a match nga an khelh tawhah a inlan vek a, a passing accuracy hi 85.36% a tling.
Tun season ISL-a emerging player of the month hmasa berah a phu ang ngeiin thlan a ni a, Apuia chuan, "Season hmasa khan Emerging Player of the League-ah min thlang a, kuminah chuan senior player huang chhungah min dah ve tawha ka ngaih avangin ka dawn ka lo ring chiah lo," tiin Vanglaini a hrilh.
Apuia chuan ISL player man to ber ni chunga Mumbai tana a khelh chungchang sawi zuiin, "Hliam dam hlim ka nih avangin a tirah khan ka buai deuh a, mahse, ka khel ṭha chho telh telh niin ka hria a, ka lawm khawp mai," a ti a, "Kan squad hi a chhah angreng a, bench aṭanga lut pawhin danglamna an thlen zel theih avangin champion thei team-a khelah ka inngai a ni," tiin Vanglaini a hrilh zui.