A thiam 16 zingah Villarreal

UEFA Champions League group stage chu khelh zawh a ni ta a, Ningani zan khan Atleti Azzurri d'Italia-ah Villarreal-in mualneitu Atalanta 3-2 in an hneh. Yellow Submarine hian group F-ah pahnihna dinhmun luahin last 16 an lut a, Atalanta erawhin Europa League an khelh chhuhnzawm a ngai dawn thung.

Villarreal-in khualmualah bul an ṭan ṭha a, minute thumna lekah Armaut Danjuma hmangin minute thum lekah hma an hruai. Etienne Capoue-a'n minute 42-naah Spanish club goal hnihna a khung a, goal hmahruai khungtu Danjuma-a'n minute 51-naah a khung belh leh bawk.

Atalanta-in last 16 lut tura chak an mamawh avangin goal li khung a ngai. Goal thum an chhuah hnuah Rusian Malinovskyi-a'n minute 71-naah ṭha zetin a hlap lut a, minute 80-naah Duvan Zapata-a'n a khung belh leh bawk.

Dinhmun ṭha tawha inngai Villarreal an hlauthawng a, Atalanta goal bawh a na bawk. Zapata-a'n Remo Freuler ball cross chu keeper Geronimo Rulli zawnah chiah a tauh. Substitute Luis Muriel-a'n box pawn aṭangin goal ban a pet per a, hemi per hi Rafael Tolói-a'n dang fuh tawk loin goal pawnah chiah a kal bawk.

Villarreal an ṭang tlang a, khual-mualah 3-2 in an chak hram. Season liam taa Europea League champion hian an club history-a a vawi thum nan Champions League knockout stage an thleng.

Champions League last 16 draw hi December 13, Thawhṭanni tlai dar 4:30 hian Nyon, Switzerland-ah pawh a ni dawn. Last 16-ah hian group khata awm team an inhmachhawn thei lo a, ram khata awm pawh kawp theih an ni lo bawk.

Villarreal hi pahnihna an nih avangin group winner an hmachhawn dawn. Yellow Submarine hmachhawn theihte chu Manchester City, Liverpool, Ajax, Bayern Munich, Manchester United, Lille leh Juventus te an ni a, pakhatna dinhmun hauh zingah Spanish club Real Madrid chiah last 16-ah an hmachhawn thei lo.