Vaccine la lo Kimmich-a'n harsatna tawk

Bayern Munich midfielder Joshua Kimmich chu Covid-19 a kai avangin a chuapah harsatna a tawk a, kumin chhungin a inlan dawn tawh lo. Kum 26 mi Kimmich hian vaccine a la lo a, Nobvember thla khan hri leng hi a kai a ni.

Kimmich-a inkhung hran hun hi Nilaini khan a tawp a, amaherawhchu Germany interna-tional hi Covid-19 in a chuap a fan hman avangin training zawm an la remti lo. Bayern midfielder chuan, "Team zinga tel hi ka châk tawh takzet. Covid-19 ka kai avangin dawhtheih a ngai a, match thum chhung chu en leh phawt a ngai dawn. January thla aṭang chuan ka khelh theih tawh ka beisei," tiin a sawi.

November 20-a Bayern-in Augsburg 2-1 an hneh loh ṭumin Kimmich hi a khel lo ṭan a, Bundesliga inkhel danga Arminia leh Borussia Dortmund bakah Champions League-a Dynamo Kiev leh Barcelona an hneh ṭumin a khel lo.

Bavarians hian kumin chhungin match thum an la nei a, zanin dar 8:00 hian Mainz an mikhual dawn a, VfB Stuttgart leh Wolsfburg te an la hmachhawn dawn bawk. Kimmich chuan, "Hriat lohna avangin vaccine ka la duh lo a, tunah erawh lak tumin ka rilru ka siam tawh," tiin a sawi.