Madrid derby: A 'hot' loh ring suh!

Cristiano Ronaldo leh Lionel Messi chhuah hnuah El Clasico boruak a dai ta deuh a, Spanish football-in superstar pahnih an chân tawh avangin Spanish football pawhin tun hma angin ngaihven a hlawh tawk ta lo.

Mahse, Madrid derby ropuina erawh lak bo theih a ni lo a, hman aṭang tawha club inhal em em Real Madrid leh Atletico Madrid-te an 'indona' mual a ni tlat alawm!

Pathianni zan dar 1:30-ah Madrid derby hi khelh a ni dawn a, La Liga match khel turin Real Madrid-in an hmelma kumhlun Atletico Madrid an mikhual dawn e.

Real Madrid hian La Liga-ah match 16 khelin point 39 an nei tawh a, palina Atletico Madrid hian match khata khel tlemin point 10-in an phak lo mek - champion lai Atletico tan beiseina thar insiamna hun ṭha a ni.

Chanchin lawmawm
Club lianten match pawimawh an khelh hmaa an mamawh chu result ṭha a ni - result a ṭhat loh chuan team boruak a ṭha thei lo a, an elpui team lakah chetsual a awl bik.

Atletico hian November thla tawp khan AC Milan chu 1-0 a ngam loin Champions League-a an dinhmun a derthawng hman a, league-ah 4-1 in Cadiz sawp zui mah se kar liam ta khan Real Mallorca lakah 2-1 in an tlawm bawk.

Mahse, Madrid derby a thlen dawn meuh chuan Atletico an insiamṭha hman a, khualmualah 3-1 a FC Porto hnehin Champions League last 16 an inpetkai - an boruak ṭhat vanglai tak a ni.

Atletico boss Diego Simeone a thaw 'huai' ang tih a chiang a, Santiago Bernabeu-ah point thum hmuh beiseiin an leng lut ang - an chak chuan match khata khel tlemin point sarihin an inthlau dawn a, Atletico tan nomawi humhim beiseina thar a awm thei ang.

Suarez tel lohna?
Result ṭha avangin Atletico an phur mai thei a, chutihrual chuan tun hnaiah player inhliam an ngah hle - he thu buatsaih a nih thleng hian Porto laka hliam vanga lakchhuah ngai Luis Suarez dinhmun a la sawi chian theih loh a, tawnhriat nei ṭha striker hi a inlan thei lo a nih chuan Atletico tan chânna a tling ang.

Hetihrual hian Porto laka hliam vanga inlan thei lo centre back Jose Maria Gimenez leh Stefan Savic ten dam lam an pan a, hrem tawk Felipe chu La Liga lamah hrem a ni ve lo bawk - Porto laka tlarhnunga defensive midfielder Geoffrey Kondogbia khelh ang kha a thlen nawn kher a rinawm tawh lo.

Chutihrual chuan Antoine Griezmann-a'n Atletico-a a vanglai tak tak ang khan a khel chho leh ta niin a lang a, French forward hian tun season-ah match 20 khelin goal sarih a khung a, assist vawi thum a nei tel bawk.

Tlarhma lamah hian Suarez inlan thei lo pawh ni se Griezmann bakah João Félix, Ángel Correa leh Matheus Cunha te ho an la awm cheu tih hriat a ṭha a, Real hian an lo zuam ringawt a nih chuan an zuam sual ang.

Real an ṭha
A vawi hnih nana Real coach hna chelhtu Carlo Ancelotti hi a tumah a chiang a, Spanish club hi a enkawl ṭha tih loh rual a ni lo - La Liga-ah hma an hruai a, Champions League last 16 chiang takin an lut a, team boruak a ṭha hle.

Real hi inelna hrang hranga an match hnuhnung pakuaah an chak vek - chu mai a ni lo, goal 37 ngawt an khung tawh a, La Liga-a an goal khung ang zat khung ve teuh ber chu Atletico Madrid niin, goal 27 an khung ve tawh.

Mahse, Real tan hian an league match hnuhnung berah hliam vangin Karim Benzema lakchhuah a ngai a, he thu buatsaih a nih thleng hian French striker hi a inlan theih dawn leh dawn loh a chiang lo.

Real boss Carlo Ancelotti chuan Benzema hian mimala training a neih thu erawh a sawi a, team training pawh a la zawm lo a nih chuan zaninah a inlan a rinawm loh zawk.

A pawi lo
Benzema-a'n tun season-ah match 20 khela goal 17 khungin assist vawi riat a nei tawh a, ani ang striker hriam hi a inlan thei lo a nih chuan Atletico tan chuan lawmna tur a ni.

Chutihrual chuan Real hian Atletico hneh tur khawp squad chu an neiah an inngai ang tih hriat a ṭha - Brazilian rawlthar beiseiawm ni ṭhin, beisei ang taka goal khung uar zui lo Vinícius Júnior-a'n Ancelotti enkawlna hnuaiah harh tharna a chang.

Kum 21 mi forward hian tun season inelna hrang hrangah match 22 khelin goal 12 a khung tawh a, assist vawi sarih a nei bawk - a professional career-a a season hman ṭhat ber ṭum a la ni a, Atletico tan ven bik a sual lo ang.

Real squad en ila, goalkeeper Thibaut Courtois, defender David Alaba, midfielder Toni Kroos leh Luka Modric te pawh an la awm a, Pathianni zanah he team hian La Liga-a an dinhmun an sawh ngheh lehzual a rinawm zawk - mahse, Atletico hi Diego Simeone-a enkawl kha an ni miau a, awlsam takin an tlawm lo ang.