Premier League-ah Covid-19 inkhuahkhirhna khauh zawk

Premier League chuan a hnuaia club 20 te chu England-a Covid-19 dan thar vangin inkhuahkhirhna khauh zawka kalpui turin a hriattir. Dan tharah hian season ṭantirha hman 'social distancing' zawm ṭhat pawh a tel.

Covid-19 vaccine la ṭha club-te chungah hriatthiamna an nei a, amaherawhchu hri leng chhuak thar Omicron a rawn awm leh tak avangin club zawng zawngin inkhuahkhirhna hi ṭha taka an zawm leh a ṭul dawn.

Tottenham Hotspur-in harsatna lian tak an tawk mek. Spurs player pariat leh staff member panga an positive avangin Europa Conference League-ah Rennes an hmachhawn thei lo a, Pathiannia Brighton & Hove Albion nen an inkhel tur pawh ṭhulh a ni.

Spurs hi tun hnaiah an vanduai hle. November 28 khan Burnley nena an inkhel tur chu vur tla vangin sawn a ni tawh a, Covid-19 vanga match hnih an khelh tur sawn a nih leh takah chuan fixtures vangin season chawhnu lam a harsat phah ang.

Dan tharah hian mi 10,000 chin punkhawmnaa kal tur chuan vaccine vawi hnih la tawh a nih loh pawhin PCR negative certificate neih a ngai a, Premier League club zawng zawngin Nilaini aṭangin dan thar hi an zawm a ṭul dawn a ni.