Hriat ngai loh inelnaah Leicester City!

Leicester City manager Brendan Rodgers chuan, "Zep thu a cheng lo, eng inelna nge a nih ka hre lo," tiin Europa Conference League chungchang a sawi a, a hriat ngai loh inelna chu a hmachhawn a ngai dawn ta.

Foxes hian Europa League group C hmahruaitu ni chungin Napoli an lenchilh a, 3-2 a an chak loh avangin knockout stage an lut phak lo. European football inelna sang pathumna lamah an inlan zui a ngai dawn.

Group C inkhel dangah Spartak Moscow chuan Legia Warsaw chu 1-0 a hnehin group hmahruaitu an ni daih a, anmahni ang bawka point 10 hmu ve tho Napoli nen an tlang - Foxes tan hmun a awm ve lo.

Premier League club hian an player ṭha Jamie Vardy, Youri Tielemans leh James Maddison te bul an ṭantir a, mahse an tum ram an thleng zo lo. Italian club lamin Adam Ounas leh Elif Elmas te goal hmangin hma an hruai nghal.

Foxes hian chawlhlawk hmain Jonny Evans leh Kieran Dewsbury te hmangin an sut a, beisei an nei sang leh hman. Amaherawhchu, mualneitu lamin second half-ah Elams hmanga an goal thumna khungin an tlang daih.

Inkhel dangah West Ham pawh an chak lo. Hammers hi an mikhual Dinamo Zagreb lakah 1-0 in an tlawm, chak lo mah se David Moyes-a naute hi group H hmahruaitu an ni chiang tawh tho a, an player ṭha tam zawk chawlhtir chungin mikhual hi an lo thleng a ni.

Moyes chuan, "Chak loh hi chu a pawi, eng inelna pawh ni se chak zel theih hi duhthusam a ni. Ka nauten an khel ṭha tlang hle a, lawmawm viau mah se chak loh hi chuan nghawng a nei ṭhin," tiin a sawi.

Hammers hian Pathianni zan dar 7:30-ah Premier League an khel zui leh dawn a, West Ham an mikhual ang.