Khade-a'n chawlhah vau

India tuihleuh thiam Asian Games bronze medalist Virdhawal Khade chuan Tokyo Olympic atana inpuahchahna kalpui theih a nih loh chuan chawlh a rilruk thu a sawi. Khade coach Nihar Ameen pawhin Sports Minister hnenah Khade harsatna chungchang ngaihtuahsak turin a thlen hial.

Kum 28 mi Khade chuan, "Indian swimmer-ten pool kan tlawh lohna hi thla thum a tling ta. Athletes dangten social distancing zawm chunga training an neih theih chuan swimmer-te pawhin kan theih ve ka ring. Hemi avang hian swimmer dangten infiamna chawlhsan an ngaihtuah ve loh ngei ka beisei," tiin training an neih theih loh avanga chawlh hial a rilruk thu a sawi a, an elpui dangte laka an hnufual tur thu a sawi tel bawk.

Virdhawal Khade hian Asian Games 2010-ah 50m Butterfly huangah bronze medal a la tawh a, South Asian Games-ah gold medal pathum a la tawh bawk. Swimming-a a hlawhtlinna avangin Khade hian kum 2011 khan Arjuna award a dawng.