Jurgen Klopp: Liverpool-a danglamna thlentu

Kum 30 hnua a vawi khat nan Liverpool-in Premier League nomawi an chawi a, football khawvelah chuan he dinhmun thleng tura Liverpool boss Jurgen Klopp leh a naute hnathawhin sawi a la hlawh reng.

Liverpool hi English mai ni lo European football-a club lian ber pawl chu an ni ngei a, mahse Klopp-a'n a zawm lai erawh kha chuan Premier League-ah 10-na an ni a, an dinhmun a chhe takzet. 

Fan-ten beiseina nen kum tam an thlir liam tawh a, kum 1990-a league nomawi an chawi hnuah Champions League, FA Cup, UEFA Cup leh League Cup nomawi te chawi mah se an duh ber Premier League nomawi an chawi thei lo. Michael Owen, Robbie Fowler, Fernando Torres, Luis Suarez leh Steven Gerrard te an thlir liam a, Premier League nomawi reng rengin an lam a hawi lo - a beidawnthlak takzet.

Liverpool hian coach ringawt pawh Graeme Souness (1991-94), Roy Evans (1994-98), Evans/Houllier (1998), Gerrard Houllier  (1998-2004), Rafael Benitez (2004-10), Roy Hodgson (2010-11), Kenny Dalglish (2011-12) leh Brendan Rodgers (2012-15) te an nei tawh a, tuman hlawhtlinna an chhar thei lo. 

Hetihlai hian German coach pakhat, a hming Jurgen Klopp chuan Germany-ah ropui taka a hming chherin football khawvel a lo run mek a, English club zinga Klopp lo rim hmasatu chu Manchester United an ni. Kum 2013 khan United hian Jurgen Klopp hi Old Trafford-a lakluh tumin an lo dawr tawh a, United executive vice-chairman Ed Woodward chuan German coach hi Old Trafford leh a chhehvel a fanpui hman tawh hial. 

Mahse, Klopp hi 'pasalṭha' tih dan ang taka nupuite rawn ṭhin a lo ni hlauh a, United-in an vanduai phah ta! Klopp-a nupui hian, "I tan a ṭhat ka ring lo," tiin a pasal chu Red Devils zawm lo turin a hrilh a, United lam a hawi ta lo. 

Brendan Rodgers hnuaiah Liverpool-in an ropuina an nei let leh dawn emaw an tih laiin an talbuai a, October 2015-a herchhuah meuh chuan Premier League 2013-14 season-a pahnihna nihpuitu coach hi an ban. 

Liverpool-in coach tur an zawng nghal a, Borussia Dortmund a chhuahsan hnua chawlh hahdam thlangtu Jurgen Klopp lam an hawi. German coach hian a nupui bawk a rawn leh a, a chhanna a dang ta. "Anfield hi i kalna tur ngei chu a ni e," tih chu a chhanna a ni - zawlnei hrilhlawkna ang maiin a thleng dik. Klopp-a'n a nupui a rawn chungchang a hrilhna, Liverpool legend Phil Thompson chuan, "Khuanu duan sa ang mai a ni," tiin Klopp leh Liverpool chu intawng tur renga duan an nih thu a sawi. 

October 8, 2015 a herchhuah meuh chuan Liverpool-in an coach atan Jurgen Klopp an lakluh thu an puang a, Bayern Munich rorelna Bundesliga lo sawi nghing tawhtuin Reds a zawm thu a chian rualin thawm a ring nghal hle. 

Eng level-ah pawh ni se, coach tan nomawi tiam nghal tur khawpa huaisen hi thil harsa a ni. Klopp erawh a hlauthawng ve lo. German coach hian, "Kum li chhungin nomawi kan chawi em em ang," tiin media a hmachhawn hmasak berah a sawi nghal zat a!

Kawng awlsam erawh a ni lo. Klopp-a'n Liverpool a zawm hian club lian tana itawm tham player an awm meuh lo. Luis Suarez a chhuak tawh a, a kum tel innghah nana an lo hman tawh Steven Gerrard lah chuai lam panin US lamah a inkhel tawh. A tawi zawnga sawi chuan, engkim chu a bul aṭanga ṭan ṭhat leh vek tur a ni ber a, Klopp-a tan hmabak a ko hle. Mahse, he German coach hian vanneihna tak a nei a, chu chu thachhang dawltu Zeljko Buvac leh Peter Krawietz a nei kha a ni. 

Coach pahnih hi Mainz leh Dortmund lamah a thachhang dawltu ber an lo ni tawh a, Liverpool-ah an puanthuah tela an pu an zui avangin hmabak a êng tih loh rual a ni lo. 

Premier League table-a 10-na dinhmun luah lai team an enkawl avangin Klopp leh a naute tan kawng a awlsam lo. Mahse, season hmasa berah League Cup leh Europa League final a khel nghal a, an chak zo lo thung. 

Zawi muangin Liverpool team an din chho hret hret a, April 2018-a herchhuahin kum 17 zet a lo thawhpui tawh Buvac-a'n rin loh takin Liverpool a chhuahsan thut a, Klopp-a'n, "Ka thluak bur," tia a sawi coach banna hian Reds fan-te a nghawng na hle. Klopp-a'n tactical lama a rawn ber Buvac chan mah se, "Ka mit pakhat a ni," tia a sawi, game thlir dan thiam tak Krawietz a la kawl a, kum 2015-a Liverpool first-team development coach lo ni tawh Pep Ljinders chu Buvac hmun ruak luah turin a lalut bawk. 

Krawietz leh Lijnders hi assistant manager ve ve an ni a, a thu zawk an awm lo. Krawietz hian analyst lam buaipuiin a hnuaiah mi pali an awm a, an game khelh zawh leh hmabak an zirchiang a, hei hi an training session in ruahman nan leh player khel tur thlan nan an hmang ṭhin. 

Klopp leh Krawietz ten analyst an neih aṭanga an zirchhuah pakhat chu set-piece hman ṭangkai a ni. Ball pet thiam bik Trent Alexander-Arnold leh defender pasang an neih tak avangin set-piece zir chu a fuhin an hre thar. 

Liverpool hian 2017-18 season khan set piece aṭangin goal 13 an khung a, an lamah goal 12 a lut thung - Klopp leh Krawietz ten set-piece hman tam an rawt ṭanna hi World Cup 2018 lai vel kha a ni. 2018-19 season a herchhuah meuh chuan set piece aṭangin goal 29 an khung a, an lamah vawi riat chiah a lut thung - set piece zirna hlawhtlinna langsar tak pakhat chu Champions League semifinal-a Barcelona lama Arnold-a corner kha a ni, tih loh rual a ni lo. 

Krawietz hian kartinin Klopp-a hnenah game zirchianna, minute 90 awh chu a pholang leh ṭhin a, match an neih hma, ni khat a la awm tihin Klopp hian a player-te a zirtir chhawng ve leh ṭhin.  Hei hi Liverpool player-ten an khingpui turte dinhmun an hriatchian lehzual nana tih a ni. 

Krawietz-a'n an team khelh dan leh an khingpui tur player-te zirchiang chungin Klopp-a hnathawh tih awlsam a tum a, a lehlamah assistant coach ve tho Lijnders chuan tactical lam awnin Klopp hi a pui thung.

Brendan Rodgers hunlaia Liverpool zawm tawh, Dutch club NEC-a enkawl leh hnua Liverpool bawka kir Lijnders hi Klopp-a hnena thurawn pe ngam langsar a ni a, a ngaihdan chu tlang takin a sawi mai ṭhin. 

Ani hian training session thlengin Klopp a thawhpui a, player-te chawlh neih tur zat, training neih hun leh football piah lamah player-te enkawl dan tur ngaihtuahtu a ni a, a ṭangkai takzet. Klopp hian Krawietz leh Lijnders-te a tana an ṭangkaizia hre chungin, "Ka inrintawkna sang tak hian ka bula midangte ṭhan zelna tur a dang ve lo. Ka bula awm turin mithiam ka mamawh a ni," a ti mai!

Premier League, Champions League, UEFA Super Cup leh FIFA Club World Cup nomawi te Klopp-a'n Liverpool-ah a kawl tawh a, heng zawng zawng a thlen theih nana a player enkawl dan pawh hi fak phu a ni. 

Beisei phak lo, tia sawisel tawk Liverpool captain Jordan Henderson hi entirna ṭha tak a ni -  Stevie G hmunruak luahtu a nih vang ringawt pawhin fans tam tak chuan an zahpui hman a, Klopp-a hnuaiah erawh Liverpool legend ni turin a hming a chher ta. 

Roberto Firmino-a'n Hoffenheim aṭanga Liverpool a zawm tirh khan player pangngai ve tak a ni mai a, tunah erawh 'world class' huang chhungah dah ngei ngei a ngai ta. Virgil van Dijk, Mohamed Salah, Sadio Mane leh goalkeeper Alisson-te Klopp-a hnuaia an ṭha lehzual dan en hian German coach hian fak a phu a, Liverpool-ah a cham zel a nih chuan English club hian nomawi tam zawk an chawi chho zel ang.