Jeremy-a kutah Commonwealth Gold Medal

Jeremy Lalrinnunga chuan Senior Commonwealth Weightlifting Champion-ships neih laiah India tan gold medal a chawi chhuak. Mizo tlangval hi 67kg huangah a inlan a, medal a lakna hi Senior Commonwealth bikah a ni.

Govt. Complex tlangval Jeremy-a hi group B-ah awmin snatch-ah 141kg chawiin clean & jerk-ah 164kg a chawi a, a belhkhawmin 305kg a chawi a, an group bikah pakhatna a ni.

A dinhmun tak hre tur erawh chuan group A ngaihchan a ngai a, Pakistan lifter ṭha tak Talib Talha chu a sulhnu thlirin gold medal la tura rinkai ni mah se, clean & jerk bikah a chawi sual vek a, chhiar tur a neih loh avangin Jeremy hi a dingchang.

Mizo weightlifting coach Malsawma Khiangte chuan, "Engkim hi duhthusam ang vekin a thlen theih loh chang a awm, tuna kan thlen chin erawh a lawmawm ka ti hle. Hmasawnna tur tam tak a la awm a, Jeremy pawhin theihtawp a chhuah zel ang," tiin Vanglaini a hrilh.

Jeremy hian Youth Olympic-ah khan India tan gold medal a lo chawi chhuak tawh. Tokyo 2020-ah khan inlan phak chiah lo mah se a kum a la naupang a, atan senior huanga result ṭha neih a la harsa. Tuna a hmasawn dan thlir chuan Olympic lo awm leh tur atan beiseina sang tak a nei.

Youth Olympic gold medalist Jeremy hi kumin kum tir lamah khan a khup a hliam a, a hliam vang hian inelna a hmachhawn tam tawk lo. May thla khan infiamna huangah inlan leh ṭan mah se beisei a phak lo. September aṭang khan tun hma lama training a neih ang a nei thei leh ṭan a, tunah chuan a ṭhat dan takin a inlan leh thei tawh.