MYC chairman-in AFC C-License Course a hawng

Nimin tlai khan Mizo-ram Youth Commission chairman Dr Vanlalṭanpuia chuan football coaching zirna AFC C License Course Module 1 chu Regional Sports Centre, Saidan, Kolasibah a hawng. Hawnna program-ah hian Lalremsiami, Olympian chu Guest of Honour a ni.

Football coaching zirna hi MYC leh Mizoram Football Association thawhhonaa buatsaih a ni a, December 10-16, 2021 chhungin neih a ni dawn. All India Football Federation aṭangin coaching zirtirtu langsar Mariano Dias a rawn kal a, a hnuaiah hian Mizo football coach 22 an inzir ang.

Course hawngtu Dr Vanlaltanpuia chuan Mizo ṭhalaite tan football eizawnna tling a nih thu a sawi a, coach training neite Zoram ṭhalai football lama hma an sawn leh zual theih nana an thiamna te hmang turin a ngen a, an hlawhtlin ngei theih nan duhsakna a hlan bawk.

Hawnna inkhawmna chairman MFA joint secretary C. Vanlalmawia chuan course kalphung a sawifiah bakah course puitlin a nih theih nana nasa taka tha thawhtu Kolasib District FA chungah lawmthu a sawi. MFA senior vice president PC Vanlalhruaia chuan MYC ten phal taka Mizo ṭhalaite hmasawnna atana ṭanpuina an pe chhuak chu lawmawm a tih thu a sawi.