A ruh no no chhuakah Hamilton leh Verstappen

Intlansiak hmabak pakhat chauh a awm tawh - Formula 1 champion thar emaw, a vawi riat nana Formula 1 champion kan hmu dawn.

Khawvela car intlansiakna sang leh nghaihhlut hlawh ber Formula 1 boruak chuan a vawr tawp a thleng chho a, season kal lai chu a nihna tak engkim chinfel a ni dawn. Pathianni zan dar 6:30 hian Abu Dhabi Grand Prix an tlan ang.

Champion lai Lewis Hamilton leh kumina chak hnem ber Max Verstappen ten point 369.5 ve ve an hmu mek. Intlansiak hmabak pakhat chauh a awm tawh avangin, tun ṭuma an tlan tur hi '2021 Formula 1 Final' tia sawi theih a ni.

Driver pahnih hian kuminah thawnthu an ngah tawh. An elpui nena intai leh insut pawh hreh miah loh an nih avangin tun ṭuma intlansiak pawh hi a hmuhnawm dawn tih a chiang - chesual loa thlan thlen an duh dawn a, chutih rualin an in bakkaih leh a nih pawhin a mak lo ang.

Record a hnai
Mercedes driver Hamilton-a'n F1 title hi vawi sarih a la tawh, champion hnem ber Michael Schumacher (7 titles) nen an record an intluk mek. A champion leh a nih chuan tuma tluk phak loa record nei ṭha ber a ni dawn.

Kum 36 mi Hamilton chuan, "A nihna tak sawi chuan season tir lamah kha chuan kan dinhmun a ṭha lo a, rinkai lo zawk pawh kan ni hman a nih kha. Mahse, team thawhrimna avangin a tawp thlengin beisei kan nei thei leh ta.

"Red Bull hian kan sawi fo tawh angin car an nei ṭha a, team ṭha tak an ni bawk. Amaherawhchu, nikumah pawh khawvela a ṭha ber kan ni tih kan lantir tawh a, kuminah pawh chutiang chu kan beisei," tiin a sawi.

Britain tlangval hian F1 title a lak hmasak ber chu 2008 daih tawh kha a ni, a champion hmasak ber hian kum 23 mi chauh a la ni. Tun kuma a elpui Verstappen pawhin kumin September thla khan kum 24 a tling ve chiah.

Hamilton chuan, "Ka champion hmasak ber kha ka la hre reng. Max-a boruak tawn tur hi ka hriatthiam pui, a zauthau hle ang tih pawh ka ring, ngaihtuah ber tur pawh a hre lo mai thei," tiin a elpui tur chu a chhaih zauh.

Intluk tlanna
Media lam aṭangin beihna leh chhaih a tawk fo a, intlansiak tlankawnga a chet dan avangin hremna a hmachawn fo bawk. Max Verstappen chuan thuneitute chu inelna hnuhnung berah hian driver dang ang bawka amah en turin a duh.

Red Bull driver Verstappen chuan, "Mahni inveng tak chunga chet a ngai, ka tih sual hi a lang lian bik ṭhin niin a lang. Midang nen ang khata en ka duh," tiin a sawi a, thuneitu lam lakah boruak neih lawk a duh niin a lang.

Intlansiak hnuhnung berah khan Max hi intlansiak laklawh laiin 5 second penalty pek a ni a, a tawpah 10-second time penalty a hmu leh bawk. Hei bakah hian hremna dang pakhat a hmachhawn bawk, tun ṭumah chuan hremna hmachhawn hi a pawi thui thei dawn.

Dutch tlangval chuan sawizawmin, "Tihsual chu ka nei ṭhin ngei mai, midang pawhin tihpalh an nei ve ṭhin bawk. Mahse, thil tih inangah hremna inang hmachhawn ila a fuh ang. Engkim a lai thei ang bera tih ka duh," tiin a sawi.

Max-a hian Red Bull car a hmang thiam takzet a, theihna a neih san bawk avangin a vawi khat nana champion pawh a beisei sang hle. Nomawi chawi tur erawhin tawnhriat nei ṭha Lewis lakah a fimkhur a ngai dawn a, team puihna a mamawh bawk ang.

Team inbeihna
Season tluan thlirkir pawhin team ṭha leh chungnung zawk sawi a harsa. Driver pahnih aṭang pawhin a ṭha zawk thlan harsa tak a ni a, chak hnem lamah erawh Red Bull driver hi vawi khatin a chungnung zawk.

Red Bull team principal Christian Horner chuan, "Point hmuh a inzat a ni mai thei, mahse vawi khatin kan la chak tam zawk. Abu Dhabi-ah pawh a ṭha zawk nih chhunzawm kan tum ang," tiin a sawi, tun hma lam Sebastian Vettel hoa an champion ang kha tawn leh an tum.

A zawna vawi sarih team champion ni tawh Mercedes tan Red Bull hi an hnawk ta hle a, an driver chuam Hamilton-a'n a zawna vawi nga champion a tumna kawng leh, record siam a tumna kawnga dal theitu tur chu Red Bull hi an ni.

Horner-a chuan sawi zawmin, "Season kan ṭan dawn khan, mite chuan intlansiak 21 a zawh hnuah Mercedes nen champion inchuhin in inum ang, tiin min hrilh se la chuan kan awih lo viau ang, mahse a takin kan ti thei miau si," a ti.

Red Bull hian 2013 hnu lamah driver champion an la nei leh lo - Mercedes rorelna hnuaiah vek an awm. Kuminah hian an tho chhuak thei a nih ngat chuan, driver an neih ṭhat bawk avangin an vanglai an tawng chhunzawm thei tura ngaih a ni bawk.