Chelsea mikhual tur Leeds United

Thomas Tuchel-a kaihhruai Chelsea-in match hnuhnung pahnihah chak hmel an hmu lo a, a nghawng pawh a lian. Premier League-ah hmahruaitu aṭangin pathumnaah an tla thla a, Champions League group H-ah pahnihna an nih avangin last 16-ah team ṭha zawk an hmachhawn dawn.

Blues-in insiamṭhat ran an mamawh a, zanin dar 8:30 hian an mual Stamford Bridge-ah Leeds United an mikhual dawn. Chelsea hi tun hnaiah tlahniam viauin lang mah se Leeds manager Marcelo Bielsa erawhin an ṭhat ngai renga an la ṭhat thu a sawi thung.

Argentine manager Bielsa chuan, "Zenit nena an inkhel aṭangin Chelsea squad teh a rem lo. Kha inkhelah kha chuan an team ṭha ber an khel lo. West Ham laka an chak loh kha uluk zawka kan thlir a nih chuan an chhiatna ka hmu lo a, Chelsea khan an phu angin point an hmu loah ka ngai," tiin a sawi.

Leeds hian midfielder pawimawh Kalvin Phillips chu inhliam vangin an chhawr thei dawn lo a, Chelsea tan thu lawmawm a tling ang. Amaherawhchu Blues hian Ben Chillwell, N'Golo Kante, Mateo Kovacic, Ruben Loftus-Cheek leh Trevoh Chalobah te an chhawr thei dawn bik lo tih hriat a ṭha.