Palace ngam loh Burnley

Thawhṭanni zan khan Premier League inkhel pakhat a awm, team intiat tawk tak tura ngaih pahnih inkhelah Burnley chuan captain Ben Mee goal hmangin Crystal Palace chu 1-0 in an luhchhuah.

Covid-19 len hnua a match hmasa berah Sean Dyche-a naute hi Manchester City chuan 5-0 in an sawp a, player contract chungchangah buaina neuh neuh an neih zui avangin an tho chhuak lo mai ang tih hlauhthawnna 

a awm hman.

Selhurst Park-ah erawh Burnley tlarhnung phui ṭha tak kan hmu leh tawh, second half minute 62-naah Mee chuan Ashley Westwood-a freekick pet chu tauh lutin point thum hlu tak an hlawh chhuak a ni. Palace tan Liverpool an hmachhawn ṭuma hliam tenau tuar Wilfried Zaha a inlan thei a, danglamna erawh a siam thei lo. Defender Gary Cahill chu hun ṭha ber chhawr ṭangkai thei lo tu a ni, hnai tak aṭanga a pet chu keeper Nick Pope-a'n a dansak.

Hnehna changtu Burnley hian league match 32 an khelh tawhah point 45 hmuin pariatna dinhmun an luah a, season thara European football khelh an beiseina an chhi nung zel. Palace erawh point 42 hmuin 11-naah an tlahniam thung.

Clarets coach Dyche chuan, "Ni 100 chuang kan inkhelh loh hnua match kan nei leh thut kha chu harsa kan ti tlang hle a, tunah erawh hun rei lote chhungin ngai kan awh chho leh dawn ta niin a lang," tiin a sawi. A hma hun an zawhna chhang chhunzawmin Dyche chuan, "Chhuak tur anga min sawitu hi chu an awm ve reng, ka sawi theih chin chu Burnley hi ṭha takin ka theihtawpin ka enkawl zel ang, player pawh keimah anga club tana 100% rilru petu ka duh," a ti.

Palace manager Roy Hodgson chuan, "European football kan beiseina a la thi bik lo, match khelh hmabak kan la ngah avangin engkim mai hi nasa takin a la danglam thei. Ka hmuh dan chuan a sang pasarih zinga tel leh tel loh chu kan kuta innghat a ni," a ti.