Gomez a chawl ta

Germany striker hlui Mario Gomez chuan a club Stuttgart chu Bundesliga khel tura a tlin pui hnuah football khelh a chawhsan thu a puang zui. A match hnuhnung bera Darmstadt 98 an hmachhawn ṭumin goal khat a khung.

Bayern Munich tan pawha khel tawh Gomez hian 2018 khan Stuttgart hi a zawm a, inelna hrang hrangah match 74 khelin goal 23 a khungsak hman - German football inelna sang ber Bundesliga khel tura a tlin pui leh avangin hna a thawk ṭha hle.

Bundesliga 2 aṭang hian pakhatna Arminia Bielefeld leh pahnihna Stuttgart te chu Bundesliga khel turin an tling chiang nghal a, pathumna Heidenheim leh Bundesliga lama 16-na Werder Bremen te chuan playoff an khel ang.

Kum 34 mi Gomez chuan, "VfB tana ka thil tum chu ka hlen chhuak ta, hmuna ka hun tawp hman pawh hi ka duhthusam a ni bawk," a ti. 2003 khan Stuttgart-ah hian senior career a ṭan a, club hrang hranga a khelh hnuah a bul ṭanna hmunah bawk a hmawr a bawk.

Germany tan Gomez hian match 78 a khelh aṭangin goal 31 a khungsak a, 2007 khan German Footballer of the Year atan thlan a ni. Euro 2008 khan an ram hi pahnihna a nih pui bakah; FIFA World Cup 2010 khan pathumna dinhmun an luah.