Khawvel goalkeeper manto ber Alisson

Transfer bazar-ah Liverpool an chet nat chhunzawm zel a, khawvela goalkeeper manto ber ni turin Roma aṭangin Alisson chu pound maktaduai 66.8-in an lalut a, kum ruk chhung atan contract an ziahpui.

Kum 25 mi goalkeeper chuan, "Liverpool club leh chhungkuaa ka tel ve ta hi ka nun leh career-a thil thleng lian ber pawl a ni," tiin Anfield a pan thei chu a hlim thu a sawi a, goalkeeper vanga rei tak talbuai tawh Liverpool fan-te an thaw huai ang.

Alisson hi World Cup khelh zawh takah khan Brazil tan match nga an khelhah inlan kim vekin match thumah goal chhuah loh a nei a, season hmasa khan Serie A-ah match 37 khelin khawvela goalkeeper langsar ber pawl a ni.

Goalkeeper ṭha
Liverpool boss Jurgen Klopp chuan, "Khawvela goalkeeper ṭha ber zinga mi lakluh theihna remchang kan nei tih kan hriat khan bawhpelh kan phal lo a, club neitute pawh an phur em avangin kan lalut ta a ni," a ti.

Klopp chuan Alisson man chungchang sawi nghalin, "Transfer bazar chet vel dan kan hria a, Alisson man chungchang hi ngaihtuah fo kan duh lo. Tuna a tih hmasak ber tur chu Premier League-a insiam rem tura inbuatsaih a ni.

"Goalkeeper theihna nei sang leh rinawm tak a nih avanga lalut kan ni a, chu chu goalkeeper tana thil pawimawh tak a ni bawk," tiin an keeper thar chu tharum ngah leh chak ṭha tak a nih thu a sawi.

Mo Salah ṭhianpa
Alisson hian 2016-17 season ṭan dawn khan Brazilian club ṭha Internacional aṭangin Roma a zawm a, a season hmasa berah hian Liverpool thiampuipa ni ta Mohamed Salah nen an khel dun hman.

Season hman zawh taka Champions League Squad of the Season-a lang phak goalkeeper hian Anfield-a pan hmaa Salah nen an inbiak thu a sawi. Alisson chuan, "Enge i la nghah cheu a, tiin Mo hian message min rawn thawn a, 'Lo hahdam rawh, ka rawn thleng ṭep ania' tiin ka chhang a ni," a ti.

Alisson chuan, "Mo nena kan kheldun leh thei tur hi ka lawm takzet a ni. Goalkeeper ṭha tak a nih piah lamah mi ṭha tak a ni a, chu chu a pawimawh ber lai chu a ni," tiin Salah nena an kheldun leh tur chu a hlim thu a sawi.

Keeper manto
Kum 2001 khan Juventus chuan euro maktaduai 53-in Parma aṭangin Gianluigi Buffon an lalut a, Italian goalkeeper hi khawvela goalkeeper manto ber a ni.

Buffon man hi a hun laia sum hlutna aṭanga chhutin pound maktaduai 32.6 chauh ni mah se khawvela player manto chhut nan euro hman a ni a, season hmasaa euro maktaduai 40-a Ederson-a'n Manchester City a zawm khan a hlutna chu pound maktaduai 35 ni mah se Buffon man a khum lo.

Tunah erawh Alisson-a'n pound maktaduai 66.8-a Liverpool a zawm tak avangin khawvela goalkeeper manto ber a nichiang a, Ederson hi Brazilian tho a nih avangin khawvela goalkeeper manto pathum zingah Brazil no.1 leh no.2 keeper an awm dawn tihna a ni.