Hockey World Cup Siami telna India inlan hun

Women's Hockey World Cup 2018 chu vawiin aṭangin Lee Valley Hockey Centre, London-ah khelh ṭan a ni dawn a, Mizo nula Lalremsiami telna India team chuan an match hmasa ber atan zanin dar 6:30 hian inelna thlengtu England an hmachhawn ang.

Mizo telna

Tun hnaiah India hmeichhe hockey sawi rualin Mizo hming a ri deuh ta zel a, nikum Asian Cup an chawi ṭuma player pawimawh Lalremsiami hi tun ṭumah pawh player ṭangkai a nih leh phak beisei a ni.

Kolasib chhulchhuak Siami chuan, "Kan inbuatsaihna a ṭha tawk a, ram dang hi kan huphurh bik lo. Inelna hmachhawn ka chak tawh hle, ṭha taka ka khelh theih nan Mizo mipui ṭawngṭaipuina ka dil bawk," tiin Vanglaini a hrilh.

Commonwealth Games 2018-ah khan Siami hi India team zinga naupang ber ni chungin a inlan tawh a, tun ṭumah pawh hian ani aia senior deuh vek a khelhpui leh dawn a ni. A kum la tam lo mah se Siami hian theihna a nei sang a, junior camp-a a awm laia senior team tana koh a nih hnuah player pawimawh a ni phak zel.

Siami hian kum 11 mi chauh a nih laiin Thenzawl Hockey Academy a zawm a, 2016 khan National Hockey Academy-a zir tura thlan niin Delhi lamah a chhuk, hemi kum hian India Junior Camp-ah koh nghal niin, kum khat pawh a awm tlin hmain a theihna a san zia thup theih a ni lo - senior team lamah koh tel nghal a ni.

World Cup chu

FIH Women's World Cup hi tun hnai kum 44 chhungin a vawi 14 nan an khel dawn a ni a, India hi an inlan vawi sarihna tur chiah niin, a vawi khat nan champion an tum dawn a ni.

India tan dai ngai loh ram dai turin kawng a awlsam dawn lo, group stage paltlang tum chu an hnapui hmasa tur a ni ang. World number 10 India hmachhawn tur England hi a thlengtu an nih bakah number 2 ni lai an ni a, an khingpui tur dang US (7) leh Ireland (16) te pawh ranking sang tak an ni phak.

2018 Commonwealth Games (CWG)-ah India hian beisiena sang tak nei mah se palina dinhmun bak an luah phak lo a, an khelh dan en erawh chuan team ṭha dang lakah pawh hnehna chang thei turin theihna an nei. Coach Sjoerd Marijne-a'n a naute a remkhawm thiam a pawimawh dawn a ni.

International Hockey Fede­ration hnuaia inelna lian 2018 Women's Hockey World Cup-ah hian ram 16 an inlan dawn a, pool paliah ṭhen niin team pali zel an awmkhawm; khawmualpui lian panga champion ṭheite chu an tling nghal - India hi 2017 Hockey Asia Cup champion an nih vanga inlan thei an ni.

Pool B-ah India hi a thlengtu England, United States leh Ireland te nen an awm khawm a, an inkhelh kual hnuah a sang pathum an tlang dawn, pahnihna leh pathumna ten playoff an khel phawt thung ang - group hmahruaitu chuan quarterfinal an lut nghal dawn a ni.

Hmanah chuan...

India nulate hian tun hma chuan khaw­vel huap­in sulhnu ṭha an nei tawh ṭhin, 1974 World Cup leh 1980 Moscow Olympic-ah te palina an ni a, 1982 khan Asian games-ah gold medal an vaw chhuak zui leh bawk.

Hun hmasa lamah khawvel hriat an ni a, ropuina dang chat leh tur erawhin an nghah rei a ngai ta vang vang hle. 2002 khan Commonwealth Games-ah gold an lak leh nawlh hnuah, 2003 leh 2017 khan Asian Cup an la leh bawk.

Sulhnu en chuan India hian ram dang team an hneh thei tih a chiang a, tun hnaia an result en pawhin tun ṭum World Cup-ah hian beiseina an nei sang ngam. Chutihrualin World Cup bikah chuan tun hnai kum riat chhunga an inlan leh vawi khatna tur a nih avangin player ten tawnhriat an la ngah lo a, World Cup khel tawh pahnih Rani leh Deepika te an pawimawh zual ang.