Neymar a chhuak dawn lo

Khawvel footballer manto ber Neymar hma hun an inrinsiak a, Spanish club hausa Real Madrid hming lamrik a nih avangin engmah a chiang loa ngaih a ni. Mahse, Brazilian forward hian Paris Saint-Germain chhuahsan tumna a neih rih loh thu a sawi.

Champions League nomawi kawltu Real Madrid hian an player pawimawh ber Cristiano Ronaldo chu Juventus lakah an chan a, Portugal captain hmunruak hnawh khat tur hi an la nei lo, heivang hian Barcelona player hui Neymar hi La Liga-ah a kir leh mai dawn nia ngai an tam hman hle.

Ligue 1 champion chhuahsan a tum loh thu sawiin Neymar chuan, "Ka cham ang, PSG-ah contract ka nei mek a, ka khel chhunzawm ang. Ka rilru ka thlak lo a, Paris club tan chona thar nen nomawi tam zawk kan hlawhchhuah ka beisei," tiin a sawi.

Spanish club lian hian Ronaldo thlaktu tur an la zawn chhunzawm ngeiin a rinawm a, Neymar-a khelhpui Kylian Mbappe chu an ngaihven theih tur zinga mi a ni. PSG coach thar Thomas Tuchel-a'n hlawhtlinna liantham chan a duh a nih chuan France international chelh hi a hna pawimawh a ni ang.