Bottas-a'n contract pawtsei

Formula 1 team Mer­cedes-in an driver neih lai an thlung nghet zel. Champion lai Lewis Ha­milton chu contract an ziah pui hnuah, nimin khan Valtteri Bottas pawh 2019 thleng daih contract thar an ziahpui ve leh bawk.

Kum 28 mi Bottas-a contract thar hi kum khat chhung atan tih ni mah se, kum khat dang pawhsei theih tura tih a ni bawk. 2017 aṭanga Mer­cedes car khalhtu Bottas hian season kal laiah point 104 hmuin driver championship-ah palina a ni mek a, a teammate Hamilton tluk chiah lo mah se a chet dan hian team thuneitute lung a ti awi rih hle.

Mercedes boss Toto Wolff chuan, "Valtteri chet dan hi sawiselna tur a awm rih lo, kan tihsual ṭhenkhat leh a mimal vanduaina vang chauha hmahruaitu ni lo a ni. A vanneih ṭum nise la chuan a chung berah a awm ang," tiin a sawi.

Finnish racing driver Bottas chuan, "Team boruak a nuamin kan inpawh tlang em em a, hmasawn tuma hma kan lak reng avangin nuam ka tih chi tak a ni. Result ṭha neih ka tum dawn a, season chawhnu lam kan hman turah team tan ka theihna 100% ka pe ang," a ti.