Chhinga Vengin Police an lehthal

Lalbiakliana MFA Super Cup final lut turin champion lai Chhinga Veng chuan player 10-a khel chungin Mizoram Police 3-2 in an lehthal. Nomawi inchuhna hi July 23, Thawhṭanni tlai hian Chhingcows leh Aizawl FC hnehtu Chanmari FC ten Lammualah an khel ang.

Nimin tlai semifinal hmuhnawm takah Chhinga Veng midfielder Lalrinchhana'an an lamah a tilut a, Lalsangbera'n Police goal hnihna a khung leh bawk. Chhingcows lamin MS Dawngliana goal hnih hmangin siphurh an sut a, hemi hnu hian Lalmawizuala (Ashtea) hnawhchhuah a nih avangin player 10-in an khelh a ṭul phah.

Minute 90 chhungin chak zawk an awm lo a, extra time-ah champion lai vannei zawkin substitute Lalmuansanga chuan minute 112-naah chakna goal a khung.

Police an ṭang

Season liam ta khan Chhinga Vengin Police hi vawi thum an hmachhawnah an hneh vek a, Sanga hote hian MFA hnuaia nomawi lian pathum an chawi bawk. Kuminah erawh Chhingcows-in player ṭha an chan nual a, Police tan phuba lakna hun ṭha a ni.

Lalbiaksanga Colney-in match pawimawhah tawnhriat nei ṭha player a luhtir a, tlarhmaah Lalfakzuala leh Lalfakawma te awmin mual sirah Lalbiakhlua leh Lalsangbera te awm a, midfield-ah V. Lalṭanpuia leh Lalramtharmawia te an inkawp. An striker damkawr F. Lalrinpuia erawh mamawh huna chhawr theih turin bench-ah dah a ni.

Mizoram Police-in bul an ṭan ṭha a, minute 20-na lekah defender Lalbiaknunga (Manunga) ball vawrh luh chu Chhinga Veng midfielder R.Ch-a chuan box pawn chiah aṭanga tauhin an lamah a lut. Minute sarih hnuah Sangbera'n goal ropui khungin defender Vanlalzuia Hnamte a pet khum hnuah chiang zetin a pet goal.

Chhinga Veng an tho

Chhinga Vengin season liam taa Super Cup an champion theihna chhan Lalrinchhana Tochhawng, Malsawmfela leh R. Malsawmtluanga te chan mah se MS Dawngliana an la kawl a, Bawngkawn tlangval hian beiseina thar a siam sak.

Minute 31-naah Lalremruata penalty hlawhchhuah chu Dawngtea'n goal-ah a chantir a, 2-1 a ni. Second half-ah Chhingcows-in bul an ṭha a, 59-naah Lalrammawia ball vawrh chu Police defender pathum karah tal putin Dawngtea-a'n keeper Lalṭanpuia man hmain ball a tauh a, 2-2 in an inhnehtawk.

Inkhel a nung chho a, Lalmawizuala (Ashtea) chuan yellow card vawi hnihna hmuin hnawhchuah a ni a. Chhinga Vengin player 10 in an khelh a ṭul a, Police-in chak tumin Valpuia an luhtir bawk. Amaherawhchu darkar chanve chhung zet kim loin Chhingcows an ṭang tluan.

Extra time-ah Chhinga Veng an vannei zawk a, minute 112-naah substitute Muansanga box chhungah ṭha takin a lalut a, goal ṭha bik a khung. Police-in Chhinga Veng hneh tura an hun ṭha neih an bawhpelh a, Lalsangzuala Hmar hoten hnehna an chang.