MBBA Cup-ah upset a awm

Nimin khan Hawla Indoor Stadium-ah MBBA Cup quarterfinal khelh zawh a ni a, MSL club pahnih Mission Veng Vikings leh Tuikual South te division hnuai zawk team Republic VR4 leh Chawnpui hneh loin an tla. Champion rinkai pahnih Zarkawt BCA leh Khatla TBL te erawhin harsatna nei loin Zarkawt Serpents leh Christ Four te an hneh thung.

Semifinal hi July 25, Nilaini hian Hawla Indoor Stadium-ah khelh a ni ang. Zan dar 6:00-ah MSL aṭanga relegate Republic VR4 leh MSL champion lai Zarkawt BCA te an inhmachhawn ang a, zan dar 8:00-ah Khatla TBL leh Chawnpui te an inkhel bawk ang.

Nimin inkhel hi Zarkawt Derby aṭanga ṭan a ni a, Serpents hi MSL-ah inhlangkai leh tawh mah se BCA erawh an elpha lo hle. Player nei ṭha zawk BCA-in inkhel an thunun a, 63-41 in an chak.

Republic VR4-in MSL4-ah Tuikual South an hneh loh avangin relegation playoff an khelh a ṭul phah a, BC Bethlehem an hneh loh zui avangin Mizorama basketball inelna sang ber an khel tawh dawn lo. MBBA Cup quarterfinal-ah VR4-in phuba lain TKS hi 72-65 in an hneh.

Mission Veng Vikings-in MSL3 an champion hnuah nomawi chawi thei tur khawp squad an din thei lo a, tun hnaia veng inelnaa che ṭha Chawnpui veng club chu overtime-ah 67-63 in an hneh lo. Match hnuhnung berah MSL-a vawi hnih champion tawh Khatla TBL an inlan a, squad nei chhah team hian Chris Four an hneh awlsam.