Guardiola-a'n goalkeeper buaina chinfel a duh

Manchester City manager Pep Guardiola chuan Joe Hart-a hmalam hun chinfel thuai a duh thu a sawi a, English keeper ram tana vawi 75 zet khel thei hi World Cup semifinal thleng thei Three Lions squad-ah khan telh a ni lo a, City-ah hian nakkum June 30 thleng contract a la nei a ni.

Pep-a'n a hnuchhawn

Pep Guardiola-a'n Manchester City a zawm hmain Joe Hart hian English club hi Premier League-ah vawi hnih a champion pui tawh a, FA Cup nomawi vawi khat bakah League Cup nomawi pahnih a chawi tawh bawk.

Amaherawhchu Spanish manager-in City a zawm hnuah Hart hi UEFA Champions League qualifier-a Steaua Bucharest an hmachhawn ṭum chauhin a inlan a. Pep-a'n a khelh duh dan leh Hart-a thiam dan a iinrem loa a ngaih avangin a chhawr loh tur thu a tichiang nghal a, hemi hnu hian English keeper hi Torino leh West Ham-ah te loan hmangin a chhuak.

Torino tana a khelh lai hian Hart hian Serie A-ah a tihsual vangin goal nga an chhuah a, anni aia tihsual vanga goal chhuah tam chu Palermo keeper Josip Posavec chiah a awm. Season liam ta khan West Ham tan khelin a tihsual vangin goal li a chhuah a, English keeper aia tihsual vanga goal chhuah tam chu Arsenal keeper Petr Cech (6), Tottenham keeper Hugo Lloris (5 ) leh Bournemouth keeper Asmir Begovic (5) te chiah an awm.

Hart hi Guardiola-a'n a hnuchhawn hnuah loan hmanga a chhuahna club-ah pawh a tlatlum tawk lo a, London club tan phei chuan season liam ta khan vawi 19 chiah a inlan. Manchester City erawhin Claudio Bravo bakah Ederson Morales an lalut tawh a, Brazilian keeper hi Premier League season hmasa berah a che ṭha nghal a, a thachhawng dawltu Bravo pawh Hart-a'n a tluk loh bawk avangin English keeper tan City-ah hmun a awm tawh lo.

Club thar a hnai

Manchester City hian an elpui club hnehah Joe Hart hralh an remti lo a, Premier League top six club-ah chuan a luh a rinawm loh. Kum 31 mi Hart hian England tan vawi 75 a khel tawh a, a tawnhriat ṭha tak hi club tenau zawk tan en kan a harsa ang.

Guardiola chuan, "Joe hi kan player a ni a, a tan thil a awlsam lo. A hmalam hun chinfel dan tur kan zawn vat a ṭul," tiin chhuahtir a pawi ti lo. Tun dinhmunah Hart hian season khat contract a la nei a, a hman zawh kher a rinawm loh zawk.

English club tan transfer tawp hun hi August 9 a nih avangin Premier League club danga a luh dawn chuan hun a tam tawh lo a, Europe club dang zawm tur chuan August 31 thleng hun a la awm thung.

Champion lai City

Manchester City hian season liam ta khan league nomawi chawi turin point 100 an hmu a, goal 106 an khung. Veteran midfielder Yaya Toure chhuah mah se Leicester City aṭangin Riyad Mahrez chu pound maktaduai 60-in an lalut a, club record a ni.

Amaherawhchu City-in an lalut mai tura an ngaih Napoli midfielder Jorginho chuan Italy lama amah enkawltu Maurizio Sarri hnungzuiin Chelsea a pan thung. Pep chuan, "Kan lalut lo hi ka hnual lo. English football-ah player ṭha tak tak an rawn lut a, keini pawhin lak chu kan tum ngei e. Amaherawhchu kei chuan player-in an kalna tur thlang rawh se tih hi ka thurawn a ni ṭhin," tiin a sawi.

Spanish manager chuan, "Jorginho hi lo lalut ta reng pawh ni ila, a thinlungin Maurizio leh Chelsea lam a awn si chuan kan tisual tihna a ni ang," tiin sum hmanga player neitu club hmin chu a ril rem zawng a nih loh thu a sawi. Manchester City hi zanin dar 6:30 hian Soldier Field,Chicago-ah Borussia Dortmund nen International Champions Cup-ah an inhmachhawn ang. ICC hi season ṭan hmaa friendly match a ni a, Europe club langsar chin chu an inlan vekah a ngaih theih.