Min ring ngamtu ka mamawh - Hart

Joe Hart chu club nei loin a awm mek a, professional career-a season 17 a hman chhunga club nei loa a awm vawi khatna a ni. English goalkeeper hian a laka rinna nghat ngamtu a mamawh thu a sawi.

Pep Guardiola-a'n Manchester City a zawm hnuah Hart hi hnawl a ni, Italian club Torino-ah loan hmanga chhuahtir a ni. Etihad Stadium-ah kir leh pawh ni se a tan hmun chan beisei chi a ni chuang lo. Premier League club Burnley-ah a lut a, hetah pawh hian Nick Pope a tluk loh avangin bench chu hun a hmanna tam ber a ni. Clarets hian tun season tawp rualin a duh lam hawi thei turin an chhuah zalen.

Kum 33 mi Hart chuan, "Premier League-ah thla 18 chhung khelhna hmung chang loin mual sirah ka awm a, mi tam tak chuan lungngaia indawmkun leh chiai turin min ngai. Min ngaihdan hi a mak ka ti hran lo, thil nih theih dan pawh a ni. "Amaherawhchu chhungrilah chuan ka chiai lo, ka nihna leh theihna ka hrechiang tawk a, ka buai phah lo," tiin a sawi. Tun hnaiah hnawl ni mah se a zam phah lo a, beiseina nen hma lam hun a la thlir zel.

Hart hian England tan pawh match 75 a khel tawh a, Guardiola awm hma chuan Man City rilrawl a ni phak. Premier League vawi hnih bakah FA Cup vawi khat champion tawh a ni. A theihna ang taka a khel chhuak leh thei a nih chuan EPL khel turin a tling tawk.

Hart chuan, "Kum naupangte ni chungin senior football ka khel a, tawnhriat pawh ka ngah ve thawkhat tawh hle. Club lian sawmna duhawm tak tak pawh ka lo tawng ve tawh ṭhin, football bakah mimal nun harsa pawh ka patlang nual tawh. Ka mamawh ber nia ka hriat chu min ring ngamtu a ni," a ti.