Premier League club lianten Penalty duhsakna an dawng ; Anfield-ah Gerrard a tlawm

Aston Villa coach ni chungin Anfield-ah Steven Gerrard a kir ta ngei a, Liverpool fan-ten an club legend hi an la ngaisang reng tih lantir nan ding chungin kut an beng a, khelmualah erawh Reds-in zahngaihna an lantir lo.

Mohamed Salah penalty hmangin Liverpool hi 1-0 in an chak hram a, Villa chak zo lo mah se Anfield-a an khelh danah fak an phu. Gerrard-a'n lunglenna leh sulhnu inhnehtir a tum lo a, inkhelh zawhah pawh fans lam hawi loin dressing room a pan nghal.

Duhtak Gerrard
Anfield-ah inkhelh hmain Liverpool-in an legend an chawimawi a, big screen-ah fan-te en theih turin Reds tana Gerrard-a hlawhtlin tawhnate an tarlang a, Liverpool tana Champions League, FA Cup, UEFA Cup leh League Cup nomawi chawitu an chawimawina hi a awm lo hran lo.

Mahse, Gerrard-a'n a thin-lungah point thum chiah a dah a, Anfield-ah zahngaihna leh khawngaihna lantir a tum lo - inkhel ṭantir aṭangin a player-te theihnaah a chiang a, rei tak Liverpool dan beh a, hun tawp lama point thum beiseina nena nawr chu a tum dan a ni.

Villa an tlo
Gerrard-a game plan-ah Villa player an chiang a, rei tak chhung chu Liverpool an dang bet thei - Villa tan keeper Emi Martinez a che ṭha takzet a, Argentine keeper hian Andy Robertson, Virgil van Dijk leh Salah te khung ngei tur nia lang chu a dansak.

Mahse, minute 67-naah erawh Villa-in Liverpool an dang thei lo - Salah ball lalut chu defender khel ṭha Tyrone Mings chuan a ti tlu a, Salah-a'n goal kil sirah tun season-a a goal 21-na ni turin a khung a, Villa-in a chhanletna tur an neih loh avangin an tlawm.

Penalty vang
Liverpool keeper Alisson leh Joel Matip chetsual zarah Danny Ings-a'n goal khungna remchang nei mah se a chhawr lo a, Villa-in he thil thleng avang hian penalty beisei mah se pek an ni lo bawk.

Villa boss Gerrard chuan, "Hun tam zawk kan chelh theih avangin kan khel ṭhaah ka ngai a, chutihrual chuan vawi hnih ngawt penalty min pek loh laiin Liverpool erawh an pe lawi a, kan tan chuan a na a ni. Team pahnih kan la inthlau tih erawh chiang takin a lang a, Liverpool 'level' ang hi thlen kan tum ve chu a ni," a ti.

75 minutes
Liverpool boss Jurgen Klopp chuan, "Minute 75 chhung chu ṭha takin kan khel a, mahse, penalty kan khung hnuah kan inthlahdah hret a, kan tih loh tawp tur kan ti a ni," a ti a, Gerrard chungchang sawi zuiin, "Anfield-ah hian kumkhuain ka awm dawn lo a, ka hmun ruak luah turin Stevie ka duh," a ti. Klopp hi kum 2024-ah a contract a tawp dawn.

Gerrard chuan, "Premier League team ka enkawl a nih chuan hetiang hun hi a thleng ang tih ka hrethiam tur a ni. Ka lung chu a leng ngei a, mahse, Villa chiah ngaihtuah ka tum a ni," tiin a sawi zui a, Villa hi match nga a kaihhruai tawhah vawi thum hnehna chanpuiin vawi hnih a tlawm ta.

Chelsea chhandam nan penalty!
Tun hnaia result nei ṭha hleithei lo Chelsea chuan 3-2 in an mikhual Leeds United an hneh hram a, mahse, hnehna chang turin penalty vawi hnih an mamawh thung. Daniel James laka a foul avangin Marcos Alonso chuan minute 28-na lekah penalty a chawi a, Raphinha chuan goal-a chantir turin harsatna a nei lo.

Mahse, Blues tan Mason Mount chuan minute 42-naah a chhanglet a, minute 58-naah Jorginho chuan penalty hmangin hmahruaina goal a khung zui - Antonio Rudiger lakah Leeds goal hmahruai khungtu Raphinha a 'slide' hlauhawm hret a, penalty hi a chawi.

Stamford Bridge-ah Leeds an beidawng duh bik lo - bench aṭanga luhtir kum 19 mi Joe Gelhardt chuan a ball tawh hmasak ber hmangin a rawn khung a, 2-2 a ni. Mahse, hun pek belh minute linaah Chelsea an vannei a, Rudiger chuan Mateusz Klich lakah penalty a hlawh chhuak - boruak sangah talbuai loin Jorginho chuan a khung a, Leeds tan thawhlehna hun a awm tawh lo.

Chelsea-in point thum hlawh chhuak mah se lawm lohna tur an nei - an match hnuhnung pathumah goal riat an chhuah a, tlarhnung inremphui an mamawh. Blues coach Thomas Tuchel chuan, "Kan rilru puthmang leh engkim mai chingfel turin zanin inkhelah khan chak kan mamawh takzet a, kan khelh dan leh point thum kan hlawhchhuah danah ka hlim hle.

"Ni hnih chawlh hahdam hun kan nei a, tunah chuan kan boruak a ṭha viau e," a ti a, point thum an hlawhchhuah theih avanga a lawm thu a sawi. London club-in an match hnuhnung bera West Ham an ngam loh hnuah Leeds United an hneh a, Ningani zan dar 1:15-a Everton an mikhual tur atan team boruak a ṭha sawt ang.

A chung berah City awm zel
Manchester City-in an mikhual Wolverhampton Wanderers chu 1-0 in an hneh a, Premier League table chung ber an luah chhunzawm - goal awmchhun hi penalty aṭanga Raheem Sterling-a khung a ni. City-in Wolves lakah inkhel thunun mah se hnehna chang turin vanneihna an mamawh - first half hun pek belhah Raul Jimenez-a'n at vang liau liauin rang takin yellow card vawi hnih a hmu a, team chhe zawk hian a tlem zawk ni chunga second half an khelh a ṭul phah.

Mexican striker hian halfway line bulah Rodri chu hlauhawm takin a tlawh a, yellow card pek a ni - Rodri hian freekick hi pet a tum zui a, Jimenez-a'n hnai taka a dan luih avangin yellow card pek leh a ni a, kim loin Wolves an khel.

Player tam zawk an nih hnuah pawh City-in goal khung turin penalty an mamawh. City midfielder Bernardo Silva-a cross chu Joao Moutinho chuan a kutin a dang nia ngaiin referee-in penalty a pe a, ennawn erawh chuan a zak hnuai a fuh niin a lang.

Mahse, video assistant referee (VAR) hmanga rei ngial ennawn hnuah pawh referee-in a thutlukna a sut lo a, Sterling-a'n awlsam takin goal-ah a chantir. Wolves fan-ten red card leh penalty chhuanlam tur an nei a, chutihrual chuan City hi chak phu an ni.

Wolves keeper Jose Sa chuan vawi thum ngawt save ṭha zet zet a nei a, Conor Coady-a'n Ilkay Gundogan-a chance neih goal line aṭanga a lo tauh chhuah hman te, Phil Foden khung ngei tur Max Kilman-a'n a lo dan hman te, Jack Grealish-a'n holam taka a hlahte kha lut se mikhual team hian sawi tur an nei tlem ngawt ang.

A hunah tak Cristiano Ronaldo
Kum 36-ah meuh pawh Cristiano Ronaldo-a'n goal khung a ṭhulh thei lo - Portuguese forward hian Norwich City lakah penalty hmangin goal awmchhun a khung a, Manchester United lakah a team hi 1-0 in hnehna a chanpui.

United-in coach thar Ralf Rangnick hnuaia an match hmasa berah Crystal Palace an hneh nghal a, an attacking game hmuhnawm tak avangin Red Devils-in fak an hlawh hle. German coach hian Champions League-ah squad a siksawi vak hnuin Norwich lakah Palace laka bul ṭantir tute tho bul a ṭantir a, mahse, hmanni lawka fak hlawh United kha hmuh tur an awm leh tawh lo!

Red Devils goal nawr a na tawk lo a, Premier League-a goal chhuah hnem ber team laka chak turin vanneihna an mamawh - minute 75-naah Max Aarons chu Ronaldo ven dan ṭha bera a hriat hmangin a foul a, United legend hian tun season Premier League-a a goal na turin goal-ah a chantir.

United tan Alex Telles-a'n bar a tih per tih loh chu chance sawi tur a awm meuh lo a, keeper David de Gea-a'n Norwich tana Teemu Pukki leh Ozan Kabak khung ngei tur nia lang ṭha taka a dan avangin United-in point thum an hmu hi vannei an inti ang.

Kum 1903-a Ernest Mangnall hnuah Rangnick chu United coach zinga league match hmasa pahniha goal chhuah lo hmasa ber a ni a, defender Victor Lindelof chu second half-ah a awm na tih hmel taka dawm chungin chhuak mah se Rangnick chuan ngaihtuahawm a nih loh thu a sawi.