Arunachal hnehtu Mizoram

Board of Control for Cricket in India (BCCI) hnuaia state hrang hrang inelna, Vijay Hazare Trophy (2021-22) khelh laiah Mizoram chuan Inrinni khan Arunachal Pradesh chu wicket ngain an hneh.

Nimin khan Cricket Association of Mizoram (CAM) tirha feh chhuakte hian Meghalaya an hmachhawn zui leh a, chak beiseina nei sang leh viau mah se Mizoram hi run 19-in an chak lo.

Mizoram hian match li an khelh tawhah vawi hnih hnehna an chang a, ṭum hnih bawk an chak lo thung. An group match hnuhnung ber atan December 14, Thawhlehni hian Nagaland an hmachhawn leh ang.

CAM Honorary Treasurer, tuna Mizoram team hruaitu ni bawk Zosangliana chuan, "Arunachal kan hmachhawn ṭum kha chuan a tir lamah kan che fuh lo a, kan insiamrem hnuah erawh ṭha taka khelin hnehna kan chang thei," a ti a, an match hnuhnung zawkah erawh an beisei anga thil a thlen loh thu a sawi.

Arunachal an hmachhawn ṭum hian tualchhung player Parvez Ahmed-a'n wicket thum a la a, a ni bakah hian Remruatdika Ralte, Bobby Zothansanga leh G. Lalbiakvela ten wicket khet ṭheuh an la bawk.

Meghalaya an hmachhawn ṭumin Taruwar Kohli-a'n wicket li a la ve thung a, midang an che hleithei lo. Ṭhumvawra vannei zawk Meghalaya lamin run 237 an siam chu an umphak zo ta lo. Mizoram hian over 50 aṭangin run 218 chauh an vaw chhuak.