Auba tel loin Arsenal an chak

Arsenal chuan Champions League khelh an beiseina an la chhawmnung zel. Captain Pierre-Emerick Aubameyang awm lo mah se goal khungh kawngah harsatna an nei lo a, an mikhual Southampton chu 3-0 in an hneh.

Inrinni zan Emirates Stadium-a inkhelah Gunners tan Alexandre Lacazette, Martin Odegaard leh defender Gabriel ten goal khat ṭheuh an khung a, mikhual team lamin a chhanletna tur an nei lo.

Laipui a puak
A tir aṭangin Arsenal inkhel a nung nghat phat a, minute 21-naah Lacazette hmangin goal hmahruai an khung. Goal a luh theih nan keeper Aaron Ramsdale aṭangin bul an ṭan a, team goal ṭha tak a ni.

Odegaard leh Gabriel ten an tauh lut bawk a, ball kanga hlauhawm tawk lo ṭhin Gunners tan goal hnih tauh luh hi thil ṭha a ni. Bukayo Saka leh Gabriel Martinelli te erawh an vannei tawk lo, goal ban an tih per.

North London club hian Premier League match 16 aṭanga point 26 hmuin table-ah parukna an ni, a sang pali zinga mi West Ham an phak lohna chu point khat chauh a ni - Hammers hi match khatin an khel tlem zawk.

Auba a awm lo
Arsenal hi Aubameyang hoa inlan tura ngaih an nih laiin an captain hi squad-ah pawh a tel lo. Mikel Arteta chuan, "Thuawih loh vang," tiin Auba chungchang hi a sawi a, a chhan tak erawh a sawi duh lo.

Khawthlang media-ten an tarlan dan chuan Aubameyang hi club remtihna in a zin chhuak a, mahse a let leh hun tura an tih aia tlaiah a kir chauh, hei hian Covid-19 inkaihhruaina a ti buai phak.

Tun hma pawhin Auba hian buaina a lo nei tawh. March thla khan Tottenham nen match pawimawh tak an khelh ṭumin a inlan ve lo, a inlan loh chhan hi discipline ṭhat tawk loh vang tho a ni - team captain tih atan chuan a mawi lo hle.

Arteta a ngawi
An chak avangin Arsenal an lawm a, an captain Auba chet danah erawh an lawm lo ang tih a chiang. Inkhelh banah pawh media lamin Areta hnenah zawhna an zawt zui a, mahse a chhang thui duh lem lo.

Arteta chuan, "Discipline ṭhat loh vang, a bak chu ka sawi thei lo. Chhungrila thil thleng sawi vek a rem lo," a ti. Captain a ni zui zel dawn em? tih zawhna chhang zuiin, "Auba chungchang chu ka sawi duh chin ka sawi tawh, tun hi inkhel sawi hun zawk a ni.

"Ka naute khelh dan leh kan hma baka West Ham nen kan inkhelh tur a pawimawh zawk, 3-0 a hnehna kan chan theih avangin ka hlim hle," tiin a sawi a, an captain buaina chu media hmaa sawi chhuah a duh rih lo.