Goal 300 khung thei Ibrahimovic

Hun tawp dawna Zlatan Ibrahimovic goal hmangin AC Milan chuan Udinese lakah an siphurh an sut a, an mikhualna ramah 1-1 a inhnehtawkin Serie A hmahruaitu an la ni chhunzawm.

Kum 40 mi Ibra-a'n mellung pawimawh a phun a, European league lian panga aṭangin goal 300 a khung tling ta - kum 2000 hnu lamah chuan ani bakah Lionel Messi leh Cristiano Ronaldo te chauhin hetiang hi an ti thei.

Swede striker Iba hian league goal hrim hrim chu goal 404 a khung tling tawh. Mahse, Malmo, Ajax leh LA Galaxy te chu European league lian panga zinga an tel loh avangin, tun ṭuma a mellung phunah hian chhiar tel a ni lo.

Goal 300 a khung tlinna hi - Serie A, Premier League, Ligue 1 leh La Liga te a ni a, tunah hian Italian football inelna sang berah a la khelh avangin goal hi a la khung belh ngeiin a rinawm.

Inrinni zan inkhel dangah Juventus chu an chelh leh ta. Old Lady hi Venezia nen 1-1 in an inhnehtawk. Mikhual Juve tana Alvaro Morata khung chu mualneitu lamin Mattia Aramu hmangin an sut.