MLS Cup-ah New York City an champion

MLS Cup-ah New York City leh Portland Timbers te hun pangngaiah 1-1 in an inhnehtawk a, penalty shootout-ah Pigeons hi 4-2 in an vannei. New York City tan an club history-a MLS Cup an vawi khat champion-na a ni.

Inrinni zan khan Providence Park-ah final hi khelh a ni a, New York-in minute 41-naah Valentin Castellanos hmangin hma an hruai a, injury time-ah 2015 champion Portland-in Felipe Mora hmangin siphurh an sut.

Penalty shootout-ah New York keeper Sean Johnson-a'n Mora leh Diego Valeri te penalty pet a dansak a, Pigeons tan Alexander Callens-a'n chakna goal a khung.

Kum riat liam ta khan New York City hi din a ni a, kum 2015 aṭang khan MLS an khel ṭan. Khawvel huap pawha player langsar Spain striker hlui David Villa, Italy legend Andrea Pirlo leh England midfielder hlui Frank Lampard te an lalut tawh.

America rama an football kalpui dan a dang hret a, an inelna Major League Soccer chu Eastern leh Western Conference-a ṭhen hran niin a sang pasarih ve ve ten MLS Playoff an khel. Pakhatnain semifinal thleng nghalin team dang parukin first round (quarterfinal) an khel thung.

New York City hian first round-ah Atlanta Untied 2-0 in an hneh a, semfiinal-ah Eastern Conference pakhatna New England Revolution chu 2-2 a inhnehtawk hnuin penalty hmangin 5-3 in an hneh. Conference final-ah New York hian Philadelphia Union chu 2-1 in a hneh a, MSL Cup-a an hmachhawn hi Western Conference pakhatna Portland Timbers a ni.