Bayern chak, Dortmund inhnehtawk

Bundesliga-ah champion lai Bayern Munich-in Mainz 2-1 in an hneh hram a, anmahni hnaih bertu Borussia Dortmund erawh Bochum-in 1-1 in an chelh thung. Bavarians-in point 37 an hmu tawh a, match 15 khelh zawhah Dortmund-in point rukin an pha lo.

Allianz Arena-ah mikhual Mainz-in Karim Onisiwo tauh luh hmangin minute 22-naah hma an hruai a, Bayern-in first half-ah an chhanglet thei lo. Second half-ah Bavarians ṭhatna a lang a, minute 53-naah Kingsley Coman-a'n keeper Robin Zentner kap karah a khung.

Rawlthar duhawm Jamal Musiala-a'n box pawn chiahah Mainz player pakhat bumin mawi zetin minute 74-naah a pet goal, Bavarians-in goal dang khung belh loin 2-1 in an chak.

Vonovia Ruhrstadion-ah mualneitu Bochum-in Sebastian Polter-a'n penalty aṭangin goal hmahruai a khung. Dortmund-in an nawr na a, Marius Wolf goal khung chu offside vangin pawm a ni lo. Minute 85-naah Julian Brandt hmangin Dortmund-in siphurh an sut a, goal dang a lut belh tawh lo.