Getafe beiseina a nung thar

Spanish La Liga lama top four nih tum inum boruak pawh a 'hot' chho ve zel a, Getafe chuan Champions League hmun ruak an inchuhpui Real Sociedad chu 2-1 in an hneh. 

Getafe tan hian Jaime Mata chuan minute 20-na lekah penalty aṭangin goal hmahruai a khung a, Sociedad tan Manchester United winger hlui Adnan Januzaj chuan minute 56-naah a sut. Mahse, La Liga khelh chhunzawm leh a nih hnua beisei phak lo Sociedad an ṭang rei thei lo a, Getafe tan Mata bawkin goal rawn khung lehin 2-1 in an chak. 

Kum 31 mi Mata goal khung hi minute 83-naa lut a ni a, Sociedad an tho hman tawh lo - Coronavirus vanga La Liga chawlh a nih laia top four-a awm Sociedad hian league khelh chhunzawm leh a nih hnuah match nga khelin vawi li an tlawm a, vawi khat an khingpui an in draw pui. Getafe an ropui lua bik lo - Sociedad an hneh hi league khelh chhunzawm leh a nih hnua match nga an khelha an vawi khat chakna a ni a, a hma match liah vawi khat tlawmin vawi thum an khingpui an inhnehtawkpui a ni.