Formula 1 lal thar Max Verstappen
Max Verstappen chu Formula 1 champion a ni ta. Red Bull driver hian champion lai Lewis Hamilton chu lap hnuhnung bera tlan pelin Abu Dhabi Grand Prix-ah hnehna a chang a, a vawi khat nan world champion a ni nghal bawk!
Mercedes driver Hamilton-a'n Michael Schumacher record (7 titles) kuma F1 champion hnem ber nih a tumna a tihtawpsak a ni saltiah lo a, car intlansiakna sang berah lal thar an awm a ni tih chu a takin a nemnghet bawk a ni.
A tawpah hnehna!
Max-a pa Jos Verstappen chuan, "Pahnihna nih a duh ngai lo, engtik lai pawhin pakhatna nih a duh ṭhin," tiin a sawi lawk a, a fapa hian intlansiak pawimawh leh boruak sang bera ngaihah driver tawnhriat nei ṭha Hamilton a hneh.
Lap 58 an tlan tur zinga lap 57 zetah Hamilton hi tlan ṭha leh tlan chak a ni a, lap li chauh tlan hmabak la awmah 13second vela a tlan fal theih avangin a nomawi a humhim ngei dawn ni pawhin a lang hman, mahse a tawpa huaisen zawk chu Max a ni.
Intlansiak a tawp dawn, lap khat chauh a awm tawh tihah safety car luh angai a, remchangah lain Max-a'n a tyre hman a thlak. Intlansiak an ṭhat ṭhat leh phatah Dutch tlangval hian a hma a awm Hamilton chu na taka nawrin kawng kawiah a tlan pel.
Hamilton-a'n a hmahruaina neih let nghal tumin a bei zui a, kawng kawiah in nawr tawk viau mah se Verstappen a inveng tluan thei. Pahnihna dinhmun luah tur zawka ngaih kha a tawpah a chungnung a, season hmang ṭha ber a nih avangin champion a phu.
A hma dinhmun
Formula 1 hi kum 1950 aṭanga tlan ṭan niin, tun ṭum hi intlansiak hnuhnung ber an tlan dawna champion tum driver pahnih point a inzat ṭum hnihna chauh a ni - 1974 khan point in ang nei chungin a hnuhnung ber an lo tlan tawh.
Team ṭha leh driver ṭha bik ten inelna an thunun hneh ṭhin a, intlansiak hmabak nei chungin champion a chian tawh chang a tam. Mahse, intlansiak hnuhnung berah vawi 29 zet champion tur chinfel a ni tawh, kumin hi a vawi 30-na a ni.
Driver chauh pawh ni loin Mercedes leh Red Bull te an inel tawk hle a, intlansiak hnuhnung ber hian driver champion tur chauh ni loin team chamnpion tur a tih chian avangin a hma lam boruak pawh a nung ṭha hle.
Tihsual neih loh a pawimawh tih hre chungin tlankawngah an lut, a tawpa ti fuh chu Red Bull.
Max-a hun
An intlansiakna Yas Marina Circuit hi Mercedes tan hmun ṭha a ni, 5.281km a thui tlan kawngah hian vawi ruk chak tawhin team chak hnem ber an ni - Hamilton (5wins) chu driver chak hnem ber a ni bawk, an tan chuan a hmawr bawk nan a thlan awm hle ang. Mahse, Mercedes tan hmun ṭha a nih rualin season hmasa a hnehna changtu erawh Max Verstappen a ni.
Dutch tlangval hi kumin practice hmasa berah pawh a rawn che ṭha leh nghal a, qualifying-ah tlan chak zui leh berin a hmasa ber (pole) aṭangin inelna tak bul a ṭan. Qualifying aṭangin boruak a ṭang. UAE-ah Dutch fans tam tak an fuan khawm a, inelna tak an ṭan hma qualifying an tlanah pawh an elpui Hamilton chu an 'Boo' hluah hluah, an rama Max an ṭan dan chhut kir chuan an chet dan hi a mak hran lo.
A pawi ta
Hamilton hian tun hnai intlansiak hnuhnung pali - Brazil, Qatar leh Saudi Arabia Grand Prix-a hnehna changin Verstappen hi a nih rual a, inelna hnuhnung ber Abu Dhabi GP-ah pawh intlansiak hun tam ber hmahruaitu a ni thei.
Mahse, tawnhriat nei ṭhain huaisen viau mah se mihring a nih ve tho avangin tihsual nei thei a ni a, a tawp lama second hnih vel lek a tihsual zeuh avangin F1 nomawi a kawl lai a hloh a, amah leh a team tana a uiawm dan tur chu chhut thiam phak a ni lo.
Hamilton-a'n F1 record ṭha leh ropui hrang hrang a kawl khawm ruih tawh. Mimala champion hnem fal ber erawh a la ni thei ta bik lo - German legend Schumacher ṭantute tan chuan Hamilton aia Max a champion hi lawmna tur a ni ve thung ang.
A zawna vawi riat nan Mercedes an champio
Formula 1-ah Mercedes chuan a zawna a vawi riat nan constructor champion an ni a, driver pahnih Lewis Hamilton leh Valtteri Bottas te hmangin record an siam. Constructor inelnaah Ferrari hi vawi 16 zet champion tawh mah se a zawna champion erawh vawi nga chauh an neih.
Kum 2014 khan Nico Rosberg leh Hamilton te an inkawp a, a vawi khat nan Mercedes an champion pui. Hemi hnu hian Mercedes hi season tinin an champion a, Hamilton chu an chakna hnar niin Rosberg nen vawi thum an champion pui hnuah Bottas nen vawi nga an champion pui.
Kumin hi Mercedes tana Hamilton leh Bottas inkawp hnuhnun ber a ni a, season tharah chuan Finnish driver Bottas hian Alfa Romeo-Ferrari a zawm ang.