Chelsea hmaah tla thei West Ham
Zanin hian Premier League match li a awm dawn a, Champions League khelh tum leh Premier League-a inhamtan tum an nih hlawm avangin inkhel pawimawh vek a ni. Zanin dar 12:45 hian Chelsea-in London Stadium-ah West Ham an hmachhawn dawn a, Hammers hi Frank Lampard-a inzirchhuahna a ni.
Blues inkhel nghah nan zan dar 10:30-ah Everton leh Leicester City te an inkhel dawn a, Toffees hi 12-na daiha awm ni mah se season tawp an hman ṭhat chuan Europa League an la khel thei. Hemi rual tho hian relegation zone-a awm AFC Bournemouth-in an mual Vitality Stadium-ah Newcastle United an mikhual ang.
Lampard enkawl Blues
Jose Mourinho hnuaiah Chelsea an vul tawh ṭhin a, Frank Lampard hnuaiah London club hi vul thei dinhmunah an ding. Season thar thlir phei chuan Bundesliga-a goal 28 khungtu Timo Werner leh Ajax midfielder ball thiam Hakim Ziyech te an neih belh dawn a, chutihrualin tun dinhmunah erawh tun season chauh thlir a la ṭul.
Match sarih khelh hmabak bihchian pawhin Chelsea squad hi a zahpuiawm lo hle. Goalkeeper Kepa Arrizabalaga hi khawvela goalkeeper manto ber ni tawh a ni a, tlarhnungah pawh tawnhriat nei ṭha pahnih Antonio Rudiger leh Cesar Azpilicueta ten an ho thei a, midfield-ah N'Golo Kante a awm. French midfielder Kante hi Blues laimu a ni a, Premier League-a Leicester City leh Blues champion puitu a ni tih hriat a ṭha.
Goal nawr turin hliam vangin FA Cup-a Leicester nen an inkhelh ṭuma lakchhuah Christian Pulisic a dam chian hman rinawm lo mah se Callum Hudson-Odoi chhawr theihin a awm tawh a, Ruben Loftus-Cheek leh Pedro te pawh an awm. Tawnhriat nei ṭha Olivier Giroud leh Willian ten hmun pawimawh an chang thei bawk ang.
Mahse maw...
Chelsea hian Covid-19 hnuah Aston Villa, Man City leh Leicester te an hneh vek a, amaherawhchu West Ham erawh tun season-a an intawn hmasak ṭumin Stamford Bridge-ah an hneh lo.
Blues hian an intawn hmasak ṭum hian ball possession pawh 66% zet an nei a, goal attempt pawh vawi 19 zet nei mah se goal an khung thei tlat lo. Hei tak hi zanina Chelsea ṭantute hlauhthawnna tur chu a ni a, inkhel thunun sia an chak zo lo a nih chuan an hnuaia awm Wolverhampton Wanderers leh Manchester United ten an hnaih sawt dawn.
Chutihrualin West Ham tan pawh point hmuh ngei ngei a ṭul a, tun dinhmunah Hammers hian point 27 an hmu a, relegation zone-a awm Bournemouth leh Aston Villa nen an point hmuh zat a inang chiah. Hemi a nih avang hian David Moyes hoten thih thaa an khelh a ṭul a; Chelsea tana UCL pawimawhna nge sang Hammers tana Premier League khelh zel tih chu zanin hian a hriat ang.
Zanin inkhel tur
AFC Bournemouth 10:30 PM Newcastle United
Arsenal 10:30 PM Norwich City
Everton 10:30 PM Leicester City
West Ham United 12:45 AM Chelsea
July 2, Ningani
Sheffield United 10:30 PM Tottenham Hotspur
Manchester City 12:45 AM Liverpool
# Team Pld W D L GF GA GD Pts
1 Liverpool 31 28 2 1 70 21 49 86
2 Manchester City 31 20 3 8 77 33 44 63
3 Leicester City 31 16 7 8 59 29 30 55
4 Chelsea 31 16 6 9 55 41 14 54
5 Wolverhampton 32 13 13 6 45 34 11 52
6 Manchester United 31 13 10 8 48 31 17 49
7 Tottenham Hotspur 31 12 9 10 50 41 9 45
8 Burnley 32 13 6 13 36 45 -9 45
9 Sheffield United 31 11 11 9 30 31 -1 44
10 Arsenal 31 10 13 8 43 41 2 43
11 Crystal Palace 32 11 9 12 28 37 -9 42
12 Everton 31 11 8 12 38 46 -8 41
13 Southampton 32 12 4 16 41 55 -14 40
14 Newcastle United 31 10 9 12 29 42 -13 39
15 Brighton & Hove 31 7 12 12 34 41 -7 33
16 Watford 32 6 10 16 29 49 -20 28
17 West Ham United 31 7 6 18 35 54 -19 27
18 AFC Bournemouth 31 7 6 18 29 50 -21 27
19 Aston Villa 32 7 6 19 36 60 -24 27
20 Norwich City 31 5 6 20 25 56 -31 21