Zaninah Premier League inkhel ngaihnawm
Premier League champion lai Manchester City-in zanin dar 1:30 hian Etihad Stadium-ah Leeds United an mikhual dawn. Norwich City leh Aston Villa te zanin dar 1:15-ah an inkhel bawk ang. Villa-a Steven Gerrard-a'n a thlak manager hi tuna Norwich manager Dean Smith a ni a, inkhel boruak a nung sawt ang.
Brentford Community Stadium-ah Manchester United an lenglut dawn bawk a, Ralf Rangnick-a hote leh Brentford inkhel tur erawh Covid-19 vangin he thuziah lai thleng hi chuan ṭhulh theih dinhmunah a ding.
City leh nomawi
Pep Guardiola hnuaiah Man-chester City-in Premier League nomawi pathum an chawi tawh a, palinain a hmuak mek. Tun season-ah pawh City hi hmahruaitu an ni mek a, champion rinkai ni mah se match hnuhnung bera Wolves an hneh dan erawh inchhuanna tur a awm lo.
Man City-in Wolves hneh turin penalty an mamawh a, Raheem Sterling-a'n a khung. Wolves hma hian Champions League inkhelah RB Leipzig an hneh lo. City hian hrem vangin Joao Cancelo an chhawr thei dawn lo a, Ilkay Gundogan pawh hliam vangin a dinhmun a chiang lo.
Amaherawhchu Leeds hian City aiin hliam an ngah zawk a, Bielsa-a'n hliam vangin Kalvin Phillips, Patrick Bamford, Liam Cooper, Robin Koch leh Rodrigo te a chhawr thei dawn lo. Pep-a tan chhuanlam neih a thiang lo ang.
Gerrard vs Smith
Aston Villa-in Steven Gerrard an thlang hi an tifuh hle. Liverpool legend hnuaiah Villa-in Brighton, Crystal Palace leh Leicester City te an hneh vek a, an hneh loh pawh Man City leh Liverpool an ni.
Chutihrualin zanina an hma-chhawn tur Premier League table mawngphaha awm Norwich lakah Gerrard tan pressure a awm. Canaries manager Smith hi season ṭantirha Villa enkawltu a ni a, club tana a ṭha tawka la inngai nachungin an ban.
Norwich-in Smith an la fuh a, Southampton an hneh hnuin Wolves leh Newcastle nen an inhnehtawk. Match hnuhnung pahnihah Tottenham leh Man United te an hneh lo mah se Ralf Rangnick hote laka an khelh dan thlir chuan Villa lakah pawh harsatna an siam thei ang.
Covid-19 vanga buai
Covid-19 vangin Manchester United an buai mek a, German manager Rangnick-a naute zingah hri leng kai an awm avangin Pathianni khan team angin training an nei thei lo. Player positive te hi haw tir an ni a, chutirhualin Norwich hmachhawn ṭuma squad-a awmte erawh Covid-19 an kai lo nia hriat a ni.
Hri leng vangin Man United leh Brentford inkhel hi ṭhulh thei dinhmunah a ding a, an kaltlang pui erawh chuan Rangnick-a hote tan insiamṭhatna tur a tam hle. An match hnuhnung berah penalty hmangin Norwich an hneh hram a, coach thar hnuaia an inchhuanna pressure an pe fuh thei lo a, club lian dang Arsenal leh Liverpool point hlohna Brentford Community Stadium-ah fiahin an awm ang.