Ligue 1 goal 100 khungtu Mbappe

Kylian Mbappe chuan AS Monaco lakah goal hnih khungin Paris St-Germain chu 2-0 in hnehna a chanpui. France international hian Ligue 1 bikah goal 100 a khung tling der tawh, tunah hian kum 22 mi chauh a la ni.

Mauricio Pochettino naute hian league match 18 aṭanga point 45 hmuin hma an hruai fal hle, pahnihna Marseille aiin point 13 zetin an sang fal - Marseille hian match khatin an khel tlem thung, an khelh zat khelin chak pawh ni se Paris club hi an la sang fal dawn hle.

Mellung phun
Pathianni zan Parc des Princes a inkhelah mikhual Monaco lamin hun remchang an insiam hmasa, midfielder Marco Verratti ball hloh kal zelah Sofiane Diop chuan goal ban a pet per a, a per let hi keeper Gianluigi Donnarumma-a'n a lo man.

A hnu lam chu PSG chan a ni chhunzawm, minute 12-naah Angel di Maria penalty hlawh chhuah chu Mabppe-a'n a khung a, chawlhlawk hmain an goal hnihna leh Ligue 1 bika a goal 100-na ni bawk a khung.

Goal hnihna luh theih chhan hi Lionel Messi a ni. Messi hian Monaco lam ball inpek sual chang fuhin a tlanpui a, an khingpui defender pathumin an chuh karah ven loha awm Mbappe tan a siamsak a, atan thil harsa a awm tawh lo.

France international Mbappe hian hun tawp dawnah Messi tan ball ṭha tak a pe ve thung. Argentina captain hian keeper man phak lohah cool zetin pet lir mah se, goal ban hrulah a kal liam chiah chiah a ni.

Pathumna
PSG player zingah Mbappe hi league goal khung tam pathumna a ni der. A tluk loh chu Zlatan Ibrahimovic (113 goals) leh Edinson Cavani (138 goals) te chauh an ni a, Paris club tan a khel zel a nih chuan record hi a khum ang - mahse tun season bak a khel tawh kher lo mai thei.

Inelna hrang hrangah pawh PSG tana goal khung hnem pathumna tho a ni, goal 145 a khung tawh. A chunga awmte pawh Ibra (156 goals) leh Cavani (200 goals) te tho an ni a, a elpui ten record an siam laia an kum chhut chuan Mabppe hian goal a khung tam chak bik hle.

PSG manager Poch chuan, "Point thum hmuh theih hi engtik lai pawhin a pawimawh, tun ṭuma kan khelh dan kha a lawmawm, goal kan khung bakah kan lamah a lut lo. Stadium khata tlata mipui pungkhawm khan inkhelh a ti nuamin kan chakna hnar an ni bawk.

"Kylian ka lawmpui, goal khung thei leh player ṭha bik a ni a, hetiang hun tawn hi a phu a ni. Media lamah thuthang hrang hrang awm ṭhin mah se, ani chuan khelmual chhung bak a ngaihtuah lo hi a lawmawm lai a ni," tiin a sawi.