Vaccine la lo Kimmich a inchhir

Bayern Munich player pawimawh Joshua Kimmich-a'n November thla khan Covid-19 a kai a, a chuapah harsatna neiin kumin chhung a inkhel thei dawn lo. Germany international Kimmich hi Covid-19 vaccine la duh lo zinga mi a ni a, tunah erawh a inchhiar tawh - vaccine lak ngei a tum.

Kum 26 mi Kimmich chuan, "A tirah khan hlauhthawnna leh rin-hlelhna ka nei a, vaccine pawh ka lak lawk loh phah. Covid-19 ka kai hnuah ka dam ṭha leh tawh a, chutihrualin ka chuapah harsatna ka neih avangin training pangngai ka la zawm thei lo," tiin sawi a, vaccine lak ngei a tum thu a sawi bawk.

Germany education and research minister Bettina Stark-Watzinger chuan, "Professional footballer leh national player a ni a, mi ṭhahnem tak entawn leh ngaihsan a ni. Covid-19 laka invenna ṭha ber chu vaccine lak hi a ni," tiin a sawi a, Kimmich-a'n vaccine a la tur chu lawmawm a ti hle.

Kimmich hian Bayern-in Augsburg 2-1 a an hneh ṭum khan a khel lo a, Bundesliga-a Arminia Bielefeld, Borussia Dortmund leh Mainz an hneh bakah Champions League-a Dynamo Kiev leh Barcelona an hneh ṭum pawhin a tel lo. German midfielder hi kumina Stuttgart leh Wolfsburg an hmachhawn hunah pawh a la khel lo ang.