East Bengal leh Blasters inhnehtawk

Pathianni zan Indian Super League inkhelah East Bengal-in goal khung hmasa mah se an goal neih sa an hum zo lo a, Kerala Blasters nen 1-1 in an inhnehtawk.

Kolkata club tan Tomislav Mrcela chuan minute 37-na lekah goal hmahruai a khung a, Australian club Perth Glory aṭanga East Bengal zawmtu tan Indian football-a a goal hmasa ber a ni.

Mahse, Blasters lamin tlawm bik an duh lo - Segunda club Sporting Gijon aṭanga Blasters zawmtu Alvaro Vazquez chuan si phurh sutna goal a khung a, hun tawp thlengin goal dang a lut tawh lo.

Blasters tan K. Lalṭha-thanga chuan minute 90 chhung a khel tluan a, goal luh hmaa Bethlehem Vengthlang tlangval shot aṭanga ball kal goal chu handball vangin pawm a ni lo thung.

Puitea shot hian Amarjit Kiyam kut a per a, a per lehlam chu Vazquez-a'n goal-ah a chantir. Mahse, referee-in goal hi a pek zet hnuah assistant rawnin a thutlukna a sut a, Blasters an vanduai - freekick a pe thung.

Croatia international hlui Marko Leškovic chuan freekick hi goal-ah a chantir teuh hle - Antonio Perosevic chuan Bengal tan goal khungna remchang nei bawk mah se Prabsukhan Singh Gill chuan ṭha zetin a dansak.

Blasters hi an first choice keeper Albino Gomes a inhliam a, Odisha nen an inkhelh ṭuma a khup tinatu Aizawl FC keeper hlui hi a chawlh chen tur a hriat loh.

East Bengal tan Lalrinliana Hnamte chuan inkhel bul a ṭan bawk a, Chanmari FC midfielder hlui hi minute 69-naah thlak a ni thung. Zanin dar 7:30-ah inkhel pakhat a awm dawn a, Mizoram player pariat kawltu Odisha leh Jamshedpur FC an inkhel ang.