Barca an mualpho; Madrid roreltu Real

Champions League aṭanga tla hlim Barcelona tan chanchin lawmawm a awm thei lo. Pathianni zan khan Osasuna khelmualah Nicolas Gonzalez leh Abdessamad Ezzalzouli ten vawi hnih ngawt hma hruaipui mah se, Osasuna-in David Garcia leh Ezequiel Avila hmangin an chhanglet a, 2-2 in an inhnehtawk.

Barcelona chak zawh loh hnuah Madrid derby khelh a ni a, Madrid khawpui neitu chu Real an ni - Carlo Ancelotti naute hian Atletico Madrid chu 2-0 in an hneh a, an khawpuiah roreltu dang an awm an remti lo.

Real tan Karim Benzema leh Marco Asensio ten goal khat ve ve an khung a, Atletico-in a chhanletna tur an neih loh avangin Diego Simeone-a naute tan nomawi humhim a hla ta.

La Liga-ah Real-in match 17 aṭanga point 42 neiin hma an hruai zel a, Atletico erawh match khata khel tlem chungin point 29 an nei a, palina an ni - Atletico anga match 16 chiah la khel Barca hi pariatna an ni.

Chak thei lo Barca
Real Betis leh Bayern Munich lakah a zawna an tlawm hnuin beiseina sang tak nen Barca-in Osasuna an lenchilh a, kum 19 mi Nicolas Gonzalez chuan minute 12-na lekah Gavi-a ball pass ṭha tak chu Barca tana a goal hmasa ber ni turin a khung a, Catalan club ṭantute tan beiseina a siam.

Mahse, mualneitu Osasuna tan Garcia chuan minute hnih hnu lawkah si phurh sutna goal a khung a, Barca tlarhnungten an tih tur an ti tawk lo - goal dang lut loin chawlhlawk an hmang zui.

Second half-ah Barca-in hma an sawn a, Ousmane Dembele-a'n ṭha taka ball tlan luhpuiin Ezzalzouli tan a siamsak a, kum 19 mi winger hian Catalan club hma hruaipui nan goal-ah a chantir.

Barcelona hian an mamawh result an hlawh chhuak mai dawn niin a lang hman a, mahse, Europa League khel tur club lakah hun tawp nan minute li chauh a awm tawh tihah Avila chuan a rawn khung leh a, 2-2 in inkhel a tawp.

Real tan a awlsam
Madrid derby a nih chuan inkhel boruak a 'hot' ṭhin a, Pathianni zana Santiago Bernabeu-a inkhelah erawh Real-in inkhel an thunun hneh hle - Benzema chuan minute 16-na lekah goal hmahruai a khung a, Vinicius Jr-a siamsak a ni.

Kum 33 mi Benzema hian tun season-ah league match 16 khelin goal 13 a khung tling ta der a, inelna hrang hrangah match 21 khelin goal 18 a khung ta bawk.

Ancelotti hnuaia harhtharna chang Vinícius-a'n goal khung lo mah se Real goal hnihna Asensio khung pawh a siamsak bawk a ni a, assist vawi hnih a nei.

Real hian inelna hrang hrangah match 10 chhung chu a zawnin hnehna an chang ta a, inelna hrang hranga an match hnuhnung 23-ah vawi hnih chiah an tlawm - league-ah pawh an hnuai chiaha awm Sevilla aiin point riat laiin an sang zawk.

Atletico an chuai
Diego Simeone-a nauten point 13 ngawtin hmahruaitu Real an thlau ta a, an inkar sawr zimna remchang an neih an chhawr lo - Atletico hi season hmasa lawka champion kha an ni ta lo em ni aw, tih mai tur an ni a, insiamṭhat an mamawh.

Atletico hian Real lakah chance an nei lo tawp chu a ni bik lo a, Real keeper Thibaut Courtois chuan vawi ruk ngawt shot dan tur a nei. Mahse, Atletico an hlauhawm tawk lo a, chak phu zawk an chak.

Simeone-a'n an goal nawr a nat theih deuh beiseiin a tira bul a ṭantir Antoine Griezmann leh Yannick Carrasco te chu minute 45-naah a la chhuak a, mahse, a luhtir Thomas Lemar leh João Félix ten danglamna an thlen thei chuang lo.

Hliam damkawr Luis Suarez pawh minute 60-naah luhtir ni mah se a team a chhanhim zo bik lo a, inkhel tawp thlenga goal khung ve loin 2-0 in an tlawm.