West Ham leh Burnley inhnehtawk

Premier League season bul ṭan fuh tak West Ham United chuan point an hloh. Hammers hi an mikhualna ramah Burnley nen goal awm loin an inhnehtawk a, inkhelh banah David Moyes-a'n insiamṭhat an mamawh thu a sawi nghal.

Inkhelh ṭan hma chuan Moyes-a naute hi chak tura rinkai zawk an ni. A takah erawh Burnley defender Ben Mee leh James Tarkowski ten hna ngah mah se, goal an chhuah lo a, Hammers tlarhma lam player an che hleithei lo bawk. An league match hnuhnung pangaah vawi khat chiah hnehna an chang.

Hun ṭha hlah
Turf Moor-a inkhelah West Ham chu ball chang tam leh inkhel thununtu an ni. Jarrod Bowen, Said Benrahma, Manuel Lanzini leh striker Michail Antonio ten an hun ṭha neih an hlah vek, goal khung tuma shot vawi 16 an neih chu a hlawhtling lo.

Hammers hian corner ringawt pawh vawi 14 an pet a, an khingpui goal bulah cross vawi 32 an neih chu goal atan an chantir thei lo vek! Dwight McNeil-a'n Craig Dawson a tih tluk avanga penalty a chawi lo chu an vannei hle.

Moyes chuan, "Burnley khan an khel ṭha takzet, player zawng zawng khan an tih tur chin ṭha taka an hlenchhuah avangin hmachhawn an harsa. Keini lam pawh kan khel chhe lo, chutih rualin kan hna hlen chhuak turin lan vannei tawk lo deuh.

"Kan khel ṭha ka tih rualin hmasawn ngaihna lai kan nei, a bik takin goal hmaah kan hriam lehzual a ngai," a ti. London club hian a zawnin goal an khung ta lo, an match lehpekah Arsenal an hmachhawn dawn avangin insiamṭhat chu an mamawh hle.

Burnley tan a hlu
Sean Dyche-a enkawl Burnley hian tun season Premier League match 16 an khelh tawhah vawi khat chiah chak an le nei, an tan chuan West Ham lak aṭanga point khat hlawh chhuah kha thil hlu tak a ni ngei ang - relegation zone erawh an chhuahsan theih phah chuang lo.

Dyche-a nauten an goal venhim chu hna puiah an nei a, defender Mee leh Tarkowski an ding khawng tlat a, keeper Nick Pope-a'n a hna a thawk ṭha bawk. Target zawnah vawi khat chiah pet thei mah se an tum ber goal venhim an ti thei, an tan result ṭha a ni.

Burnley coach Dyche chuan, "Kan khingpui a zirin khelh dan phung thlak a ngaih chang a awm, tun ṭumah kha chuan kan khelh dan tur dik takin kan khel thei. Minute 90 chhung goal chhuah loa awm theih hi lawmna tur a ni," tiin a naute khelh danah a lawm.

Dyche chuan sawi zawmin, "Player zawng zawng an khel ṭha rual, chutih rualin keeper Nick Pope khan fak a phu," tiin a keeper a fak. England coach Gareth Southgate-a'n a hmunah a en a, ani pawhin English keeper chet dan hi a hmuh hmaih lo ang.

EPL Results
Crystal Palace 3 - 1 Everton
CTY: Conor Gallagher 41', 90+3'; James Tomkins 62'
EVE: Salomon Rondon 70'
Leicester City 4 - 0 Newcastle United
LEI: Youri Tielemans 38' (P), 81'; Patson Daka 57'; James Maddison 85'
Burnley 0 - 0 West Ham