Chelsea player Gallagher a vul

Selhurst Park Stadium-ah Thawhṭanni zan khan Crystal Palace-in mikhual Everton 3-1 in an hneh a, Eagles tan Chelsea aṭanga loan hmanga an hawh Conor Gallagher-a'n goal hnih a khung.

Palace tan Gallagher-a'n minute 41-naah goal hmahruai a khung a, James Tomkins-a'n minute 62-naah a khung belh. Everton tan Solomon Rondon-a'n minute 70-naah siphurh sut ṭhenin beiseina thar nei mah se injury time-ah Gallagher-a'n chak nemnghehna a khung.

Kum 21 mi Gallagher hian kum riat a nihin Chelsea a zawm a, Blues senior team tan a inlan lo. English midfielder hian Charlton Athletic, Swansea City leh West Bromwich Albion tan loan hmangin a lo khel tawh a, tun season anga chet ṭhat erawh a la nei lo.

Patrick Vieira hnuaiah Gallagher hian league match 15-ah goal ruk a khung a, Eagles player ṭha ber ni mekin midfield-ah a hmuhnawm ṭhin hle. Gallagher hi Charlton-a amah enkawltu manager chuan Leeds United legend Lee Bowyer nen a khaikhin a, Blues academy aṭanga inzir chhuak a nih ang ngeiin Frank Lampard ngaisangtu a ni.