A chung berah Inter Milan

Serie A match 17 ṭheuh an khelh meuh chuan champion lai Inter Milan danglamna a lang a, a chung berah an awm leh ta. Inter hian an elpuite chetsual karah Cagliari chu 4-0 in an sawp a, table chung berah an awm.

Pathianni zan Serie A inkhelah Inter tan hian Lautaro Martinez-a'n goal hnih a khung a, forward Alexis Sanchez volley leh midfielder Hakan Calhanoglu ten goal khat ve ve an khung bawk.

Inter Milan hi season hmasa champion puitu manager Antonio Conte a chhuak a, an striker ṭha Romelu Lukaku an chan bawk. An talbuai deuh dawn niin lang mah se, manager thar Simone Inzaghi kaihhruaina hnuaiah team nghet pangngai tak an indin leh tawh.

Nerazzurri coach Inzaghi chuan, "European football khelh zawh hnuah league kan khel chhunzawn. Inrinni zan khan club lian leh ṭha ṭhenkhat an talbuai tih ka hmu, ka naute hnenah khan football chauh ngaihtuah turin ka hrilh.

"Ka hrilh leh sawi ang ngeiin inkhelah 100% rilru an pe, kan khingpui Cagliari kha team inveng thiam leh inman tlang tak ni mah se goal li lai kan khung thei. Ka naute hian champion rilru an la pu nghet hle," tiin a sawi.

Inkhel dangah Napoli cbu an mikhual Empoli lakah 1-0 in an tlawm, goal awmchhun hi Patrick Cutrone-a'n minute 70-naa a khung a ni. Season bul ṭan ṭha tak Naples club hi tun hnaiah an talbuai leh deuh a, table-ah palinaah an tlahniam ta.

Italy - Serie A
Torino 2 - 1 Bologna
TOR: Antonio Sanabria 24'; Adama Soumaoro 69' (OG)
BOL: Riccardo Orsolini 79' (P)
Verona 1 - 2 Atalanta
VER: Giovani Simeone 22'
ATA: Aleksei Miranchuk 37'; Teun Koopmeiners 62'
Napoli 0 - 1 Empoli
EMP: Patrick Cutrone 70'
Sassuolo 2 - 1 Lazio
SAS: Domenico Berardi 63'; Giancomo Raspadori 69'
LAZ: Mattia Zaccagni 6'
Inter Milan 4 - 0 Cagliari
INT: Lautaro Martinez 29', 68'; Alexis Sanchez 50'; Hakan Calhanoglu 66'