Chiellini leh Buffon tan contract thar

Juventus goalkeeper Gianluigi Buffon leh captain Giorgio Chiellini te chuan season khat daih contract an ziak thar a, tun season tawp ruala an contract zo tur chu nakkum June thla thleng atan an pawtsei tihna a ni.

Buffon hi kum 43 mi a ni tawh a, defender Chiellini pawh kum 35 a tling tawh - player pahnih nihna leh hlutna chu Juve tantute hmaah sawifiah nawn kher a ngai lo. An hming lamrik rualin Turin club nen an inzawmna thukzia a lang nghal vek.

Turin club chuan thuchhuah siamin, "Gigi hian kum zat chu number mai a nihzia a takin a lantir. Chiello pawhin season 16 min chamchilh tawh, a aia rei a cham tur hi kan tan lawmna tur a ni," an ti. Italy international hlui Chiellini hi a dam a nih chuan rinrawl a la ni reng a, keeper Buffon erawh Wojciech Szczesny thachhang dawltu a ni tawh thung.