Djokovic thlavang hauhtu Matic

Manchester United midfielder Nemanja Matic chuan amah ang bawka Serbian star Novak Djokovic thil tihsual chu pawi a tih thu a sawi a, chutihrualin duh reng vanga tisual an nih loh avangin dem vak ngai a ti lo.

Tennis world number 1 Djokovic leh a thawhpui ten tournament pangngai awm loh laiin Adria Tour an buatsaih a, inkhel hi a hmuna entu awm theia tih a ni. Djokovic bakah player langsar dang pathum te chuan Covid-19 an kai phah.

Coronavirus hluar laia an thiltih hian sawisel a hlawh nasa hle a, social media lamah mi hrang hrangin na tak takin an dem rawn. Djokovic pawhin thuchhuah siamin a thil tihah a inchhir thu bakah ngaihdam a dil.

Matic chuan, "Ram dang aṭanga thlir chuan Novak leh a ṭhiante thil tih hi a awm ang lo hle mai thei. Mahse Serbia ramah chuan a dan a dang, mipui chu eng pawh ni se an duh zawng apiang tih phalsak an ni. "Inkharkhipna a awm ve hran lo, kumtir lamah fimkhur taka kan kal avangin kan zalen hma. Adria Tour buatsaih kha a dik lo tia sawiseltute pawh ka dem lo, chutihrualin kan ramah ni se chuan an ngaihdan hi a danglam thei ang," a ti.