Chhani'n bronze medal a la

Senior World Weightlifting Championships leh Senior Commonwealth Weightlifting Championships neih laiah Lalchhanhimi chuan bronze medal a la. Mizo nula hi 71kg huangah inlanin pathumna dinhmun hi a luah.

Thawhṭanni zan khan Tashkent, Uzbekistan-ah Chhani hi a inlan a; snatch 90kg, clean & jerk 119kg, total 209kg chawiin Women Senior Commonwealth Weightlifting bikah pathumna a ni.

Chhani hian Great Britain mi Davies Sarah (Snatch leh clean & jerk total 234kg) leh Philippines ram aiawha tel Sarno (total 231kg) te a phak lo.

World Champinship anga chhut chuan Chhani hi 13-na a ni. Mahse, World Championship a nih bakah Commonwealth ramte tan a hranpaa lawmman siam a ni a, hei vang hian Mizo nula pawhin medal a hlawhchhuah theih phah.

Inelna hi Commonwealth Games 2022 neih tura inlan tur zawnna a ni nghal - Chhani hian gold medal a lak phak loh avangin nakkum atan a la tling chiang nghal mai lo, qualifier a hmachhawn leh a ngai dawn.

Jeremy Lalrinnunga chuan kar hmasa khan Commonwealth bikah gold medal a lo chawi chhuak tawh. Mizo tlangval hian gold medal a lak avangin Commonwealth Games 2022 atan a tling chiang nghal tawh thung a ni.