Covid vangin Raducanu inhnukdawk

Emma Raducanu chuan coronavirus a kai a, tun kar tawp lama khelh tur Mubadala World Tennis Championships-ah a inlan thei dawn lo, chawpchilh takin a inhnukdawk leh ta a ni.

Abu Dhabi-a exhi-bition match an khelh turah hian, a tira ruahman dan ang chuan Raducanu leh Olympic gold medallist Belinda Bencic te inhmachhawn tur an ni a, mipui pawhin an en châk - amaherawhchu hripui len lai a nih miau avangin duhthusamin thil a thleng thei lo.

US Open champion Raducanu chuan, "Abu Dhabi-a inkhelh ka chak takzet a, ka inkhel lai en chak an awm tih ka hriat phei chuan min ti phur zual. Mahse, tunah chuan hripui vanga inkhunghran rih ka ngai, a rang thei ang bera lo kir leh ka tum ang," a ti.

December 16-18 chhunga an khelh tur Mubadala World Tennis Championship-ah hian vawi hnih champion tawh Andy Murray chu a inlan ang.

Kum 34 mi Murray hi tun hnaiah a coach Jamie Delgado nen an inṭhen a, hun rei tak a thawhpui tawh Delgado kaihhruaina hnuaiah hian Wimbledon title pawh a la, mahse tunah chuan thil thar tawn a duh ta.

Britain tlangval hian Jan de Witt nen thawhdun an tum thu a sawi. German coach Witt hian tun hmain Gael Monfils, Gilles Simon leh Nikoloz Basilashvili te chu a lo enkawl tawh a ni.