Mizoram cricket team vanduai

Vijay Hazare Trophy (2021-22) khelh laiah nimin khan Mizoram chuan an match hnuhnung ber an khel a, beiseina nei sang viau mah se Nagaland lakah 80 runs-in an chak lo.

Board of Control for Cricket in India (BCCI) hnuaia inelnaah Mizoram hian an match hmasa berah Bihar hnehin bul an ṭan fuh hle. Mahse, an hnu lamah result an nei ṭha tawk lo - Sikkim, Maghalaya leh Nagaland te an ngam lo; Arunachal Pradesh erawh an hneh.

Nimin Soul Feel Cricket Stadium, Jaipur-a inkhelah Mizoram hi ṭumvawra vannei zawkin vawm hmasak an thlang. Nagaland lam an che ṭha rual a, mimala run siam hnem fal awm lo mah se over 50 chhungin 236 runs an tlin.

Mizoram tan target sang pangngai tak a ni a, chutih rualin umphak theih erawh a ni. Mizoram batsman an che hleithei lo, run 50 siam tling an awm miah lo. Over 48-ah run 156 chauh siamin an out vek.

Plate group aṭangin Mizoram hian knockout stage an lut phak lo. Chutihrualin match nga an khelh aṭanga ṭum hnih hnehna an chan theih avangin tournament ṭha pangngai takin an khel thihna a ni.