Arsenal khingpui tur West Ham

Premier League champion nih a awlsam lo a, team ṭhenkhat tan chuan a sang zual pali zinga tel phak ringawt pawh harsa tak a ni. Arsenal pawhin tun hma lama an awmna ṭhin hi an hmu phak ta meuh lo - tunah erawh kir leh theihna remchang an nei dawn.

Gunners hian zanin dar 1:30 hian Emirates Stadium-ah West Ham an mikhual dawn a, hnehna an chang thei a nih chuan a sang zual pali zingah an tel thei dawn. Mikel Arteta naute tan Hammers lak aṭanga point thum chhuhsak theih a pawimawh dawn hle a ni.

EPL season kal laiah Arsenal hi tluk leh din fawmin an kal mek, beiseina han nei sang ve viau ṭhin mah se hun pawimawh laiah an chesual leh khut ṭhin, palina nih theihna remchang an hmuh hmasakin Manchester United an ngam lo tawh bawk.

North London club hian an match hnuhnung bera Southampton an hneh ṭumin captain Pierre-Emerick Aubameyang inlan lo. A inlan loh chhan hi thuawih loh vang a nih avangin an captain chet dan hian sawisel a hlawh, zaninah an hrem nawn leh a nih pawhin a mak lo ang.

David Moyes-a enkawl West Ham hian season hmang ṭha viau mah se tun hnaiah an che fuh vak bik lo. Europa League leh league match-ah a zawnin goal an khung lo, tlarhnung rem phui ve tawh tak Gunners lakah pawh tlarhma lam hi an ṭhat tawk lohna lai a ni mai thei.