Premier League ngam loh Covid-19: United inkhel leh dawn lo!

Covid-19 in kianzai a rel thei lo - Premier League pawh an khel tui dawn chauha, hri lengin a tibuai leh ṭhin. Zanina Manchester United leh Brentford inkhel tur chu Covid-19 vang hian a khelh hun sawn a ni.

Premier League chuan thutlukna chu medical lama mithiamte thurawn anga siam an nih thu an sawi a, United hian hetianga thutlukna siam a nih hma hian hri darh zel tur ven nan Carrington training ground chu an lo khar tawh.

Kar liam ta, ni sarih chhung khan Premier League-a test kalpuiah player leh staff mi 42-ten Covid-19 an kai tih hmuhchhuah a ni a, ni sarih chhung test kalpuia Covid-19 kai an hmuh tam ber ṭum a ni!

January khan Premier League-a kar khat chhunga Covid-19 kai tam ber record chu siam a lo ni tawh a, hemi ṭum hian mi 2,295 ten test neiin mi 40 an positive a, tuna test result hi December 6-12 inkara neih niin mi 3,805 ten test an nei thung a ni.

Dan thar
Covid-19 a hluar leh tak avangin Premier League pawhin dan thar zawm tur a nei leh ta a, kar hmasa Ningani khan England-ah Covid-19 vanga dan thar zamte kalpui a nih angin English top flight league thuneitute pawhin club-te chu fimkhur taka kal thar leh turin a hrilh.

Premier League club-te hi social distancing uar thar leh turte, tin, mask (hmai tuamna) vuah uar thar leh turtea hrilh an ni a, player-ten therapy an la a nih pawhin minute 15 aia rei lo la tura tih a ni bawk.

Hei chauh a ni lo - medical staff-te chu player an enkawl emaw an inhnaih reng rengin PPE hmanga inthuam zel tura tih an ni. Premier League chuan, "Sorkar, tualchhung thuneitute leh supporter group te nen ṭang rualin theihtawp kan chhuah zel ang," an ti.

Vawiin aṭang chuan England-a infiamna thil huaihawtna, mi 10,000 aia tam an punkhawmnaah reng rengah negative result nei emaw, vaccine dose hnih la tawh an nih loh chuan an kal ve phal a ni dawn lo - a tichiangtu certificate neih zel tur a ni.

Tute nge buai?
Covid-19 in Tottenham a luhchilh avangin Europa Conference League-a Rennes nena an inkhel tur chu sawn a lo ni tawh a, Pathianni zana Brighton & Hove Albion nena an inkhel tur pawh sawn a ni tawh.

Brighton pawh hi an him bik lo a, coach Graham Potter chuan mi pathum/pali vel Covid-19 kai an awm thu a sawi. Leicester City lamah pawh Napoli nena Europa League an khelhah khan Covid-19 kai avangin player ṭhenkhat chu an zin ve lo.

Aston Villa boss Steven Gerrard chuan staff leh player zingah Covid-19 kai an neih nual thu a sawi a, hetihrual hian a tam zawk an him thu a sawi thung. Norwich boss Dean Smith chuan an player pakhatin Covid-19 a kai thu a sawi ve bawk.

Covid-19 hian division hniam lamah pawh zahngaihna a lantir chuang lo a, Thawhṭanni khan Sheffield United leh Queen Park Rangers inkhel tur chu hri lengin QPR lam a luhchilh avangin inkhelh hun sawn a lo ni tawh.

Eng nge an sawi?
Manchester City manager Pep Guardiola chuan hri leng laka an him theih nan a player-te chu invenna la tura a fuih thu a sawi a, Spanish manager hian a player-te chu engtiklai pawha fimkhur reng turin a chah.

Pep chuan, "Ka player-te chu fimkhur turin ni tin ka chah a, a him thei ang bera awm tur te, puipunna hmuna hmai tuam reng tur te, social distancing zawm hram hram turtein ka hrilh a ni," a ti a, hri leng chu namnul chiah a ngai lo.

Hetihlai hian Norwich boss Smith chuan a player-te chuan vaccine a nih dan tur ang thlapa an lak thu a sawi a, Burnley manager Sean Dyche chuan vaccine la ngei ngei tur ang zawnga a player-te a fuih lem loh thu a sawi thung.

Dyche chuan, "Mi tupawhin kan duh kan thlang thei a, ka player zingah vaccine la lo an awm. Mahse, kei chuan vaccine dose thum (booster telin) ka la vek a ni," a ti a, a player-te nawr lui lo mah se vaccine lak ngei chu a ṭha bera a hriat thu a sawi a ni.

Sawi chiang ru!
United leh Brentford inkhel tur ṭhulh a ni leh ta a, Covid-19 hri thar Omicron-in England a tihbuai dan chu pui tak a ni - hetiang boruak karah hian coach-ten an inkhelh dawn leh dawn loh pawh an hrechiang hleithei lo a, Arsenal manager Mikel Arteta chuan dan mumal tak neih a duh thu a lo sawi tawh.

Arteta chuan, "Kan inkhelh dawn leh dawn loh pawh kan hrechiang thei lo a ni," a ti a, UEFA-in dan mumal tak a neih anga neih ve a ṭhat thu sawiin, "Club chuanin kan ṭangkaipui ngawt ang," a ti.

Tun dinhmunah chuan English top flight-a match ṭhulh turin positive zat emaw, negative zat emaw tarlan a awm lem lo a, club tan chuan buai ve theih tak a ni - August khan Arsenal hian 2-0 in Brentford an ngam lo a, kha inkhelah khan Pierre-Emerick Aubameyang, Alexandre Lacazette leh Alex Runarsson te chuan hri kai mah se Arteta hian inkhelh hun sawn a dil lem lo a ni.

Brentford boss Thomas Frank pawhin Arteta ngaihdan hi ṭawmpuiin, Premier League chu Covid-19 vanga inkhelh ṭhulh chungchangah dan mumal tak zam turin a ti a, manager pahnih duh ang hian Premier League-in dan thar an siam a nih pawhin a mak lem lo ang.