Muaythai player feh chhuak

National Muaythai Championship 2021 khel turin nimin zing khan Mizoram team chuan Aizawl chhuahsanin Manipur an pan.

December 16-20 chhungin Imphal, Manipur-ah India rama Muaythai thuneitu sang ber United Muaythai Association India chuan senior national muaythai championship a buatsaih dawn a. Senior level hi chi hnih - Elite class leh Under 23 class-ah ṭhenin tunah hian state hrang hrang aiawh turte chuan Manipur an pan khawm mek a ni.

Tun ṭumah hian Mizoram aṭangin player pali - Paul HD Lalruatkima, George Lalmuanawma, Lalhriatpuia leh Lalrinnungi ten fight an hmachhawn ang a, coach Lalchhuanawma leh manager Vanlalawmpuia ten an hruai. National Championship neih rual hian UMAI Annual General Body meeting neih nghal a ni ang.

Kum dang aia player an tirh tlem chungchangah Mizoram team manager Vanlalawmpuia chuan, "State championship kan buatsaiha gold medal la chin aṭangin national kal tur hi kan thlang a, chutihlaiin Covid-19 hri leng avang te, sum harsatna avangtein player kan in hruai tam thei lo, a kal thei chhunte erawh gold medal la ngei tura kan beiseite a ni," a ti.

National Muaythai Championship hnuhnung ber 2019 khan Mizoram chu overall team champion niin gold medal 10, silver leh bronze medal pakhat ve ve lain a thlengtu Karnataka pahnihna an ni a, Kerala pathumna an ni.