Aguero a chawl dawn

Barcelona striker Sergio Aguero chuan inkhelh a chawlhsan dawn niin khawthlang media ten an tarlang a, Argentine striker ropui hian vawiinah a chawlh thu hi puang tura beisei a ni.

Kum 33 mi striker hian nipui lai khan beiseina sang tak nen Barcelona a zawm a, mahse, chawn hliamin a tlak buak a, a dam hnuah thawk lam harsatna avangin buaina a nei leh a, chawl turin thutlukna a siam ta niin a lang.

October 30 khan Aguero hian Barca jersey hain Alaves a hmachhawn a, mahse, inkhelh laiin thawk lamah harsatna a neih avangin khelmualah enkawlna pek a ni a, lakchhuah niin damdawi in panpui zui a ni.

November thlatir khan Barca chuan an player hian thla thum chhung inenkawlna a kalpui tur thu an puang zui a, mahse, thla hnih pawh a ral hmain inkhelh a chawlhsan tur thu a ri ta.

Aguero hian cardiac arrhythmia (lung lam fel lo) a nei niin sawi a ni a, a dinhmun thlirin inkhelhpui chi zelah a ngai lo niin a lang.

Manchester City legend hi Premier League-a player ropui ber pawl a ni a, City tan inelna hrang hrangah match 390 khelin goal 260 a khung a, heng zingah hian hattrick 16 ngawt a tel!

Premier League-ah goal 184 khungin English mi ni lo zinga English top flight league-a goal khung hnem ber a ni a, amah hnaih bertu Arsenal legend Thierry Henry aiin goal kuain a khung hnem zawk.

Aguero hian Premier League-a goal khung hnem lamah Alan Shearer (260), Wayne Rooney (208) leh Andrew Cole (187) chiah a phak lo a, chutihrual chuan minutes-per-goal anga chhut chuan tluktu an awm lo - minute 107.9 dan zela khung ang a ni.

City tan Premier League nomawi panga, FA Cup (1) leh League Cup (6) nomawite a chawi a, Etihad Stadium-a a hun tawp lamah hliamin a tlak buak avangin a inlan tam tawk lo.

Nipui transfer-ah khan a contract hmang zoin a thlawnin a chhuak a, club sawmtu tam tak nei mah se a ṭhianpa Lionel Messi khelhna Barca tana khelh a thlang a, mahse, thutlukna a siam fuh tawk lo.

Sum vangin Barca an talbuai zui a, an player lei tharte pawh an ziak lut thei lo a, Aguero-a'n Catalan club a pan chhan ber anga ngaih Messi pawh chelh thei loin Paris Saint-Germain lakah an chân.

Barca-in an harsatna ṭhenkhat an sutkian hnuah Aguero an ziak lut a, mahse, hliam vangin October thleng a chawl zui - Barca tan match nga chiah khel hmanin goal khat a khung a, a goal awmchhun hi El Clasico-a a khung a ni thung.

Aguero hian Spanish football-ah ropui takin a lo khel tawh a, kum 2006 khan a professional club hmasa ber Independiente aṭangin Atletico Madrid a pan a, Spanish club lar tan hian match 234 khelin goal 102 a khungsak.

Atletico tan hian kum 2010 khan Europa League nomawi a chawi a, season khat a khelh leh hnuah kum 2011 khan pound maktaduai 38-in City a zawm - a hnu zela a sulhnu kan hria a, tunah chuan a boot a khai dawn ta.