Danmawia goal Highlander mualpho khuh nan a tawk lo

'Sialhawk Express' tia Mizo football ngainatuten an hriat lar R. Laldanmawia chuan Indian Super League-ah NorthEast United tan goal a khung a, mahse, Dinthar FC forward hlui goal khung hi Highlander mualpho tur ven nan a tawk lo - Hyderabad lakah 5-1 ngawtin an tlawm!

Hyderabad tan Chinglensana Singh chuan minute 12-na lekah goal hmahruai a khung a, Manipur defender goal khung hnuah hian Bartholomew Ogbeche chuan goal khat dang a thawh ve leh bawk.

Minute 30 pawh a tlin hmain Hyderabad-in 2-0 in hma an hruai fel der a, NorthEast United an che hleithei lo. Minute 43-naah R. Laldanmawia a rawn inlar chat a, Mizoram Premier League chhul chhuak forward hian Khalid Jamil-a naute beiseina thar siamsak turin si phurh a rawn sut ṭhen.

Goal dang pawh lut loin chawlhlawk hman a ni a, NorthEast United hian an khingpui pawh thlak mai theih inbeiseina an nei tlat - mahse, an beisei ang ngawtin thil a awlsam lo.

NorthEast United tan full back Joe Zoherliana'n ṭha takin ball a thlawh lut a, R. Laldanmawia'n khungna remchang nei mah se a ball tauh chu chung lamah a kal.

Hyderabad tan Ogbeche chuan minute 78-naah a goal hnihna a khung leh a, 3-1 a ni der - minute a tam tawh lo a, goal an chhuah belh bawk avangin Khalid Jamil-a naute tan beisei a bo ṭan.

Highlander an tho tawh lo - Aniket Jadhav chuan minute 90-naah Hyderabad tan a khung belh a, Javier Siverio chuan hun pek belhah a khung belh bawk avangin NorthEast United an mualpho.

Guwahati club tan hian Joe leh Danmawia ten inkhel bul an ṭan a, Rochharzela leh Lalkhawpuimawia te chu bench aṭanga luhtir an ni bawk - goal beiseia luhtir Mizo forward pahnih hian goal an pai tel lo thung.