Serie A ; Jose Mourinho naute chak ve leh ta
December thla Serie A an khelh hmasakah AS Roma an tlawm ve ve a, tunah chuan an tan hun ṭha a rawn inher chhuak ve leh ta. Jose Mourinho naute hian an mikhual Spezia chu 2-0 a hnehin point thum an hlawh chhuak.
Thawhṭanni zan inkhelah Roma tan hian Chris Smalling leh Roger Ibanez ten goal khat ve ve an khung a, hun tawp dawnah substitute Felix Afena-Gyan chu hnawhchhuah ni mah se an buai phah tawh lem lo.
Chak ve ta
A zawna Bologna leh Inter Milan an hneh loh avangin Roma dinhmun a hniam hman viau, an tan a sang pali zinga tel phak pawh tih huphurhawm leh harsa tur niin a lang - mahse Mourinho naute hi beisei aia hmain an insiamṭha thei dawn niin a lang.
Stadio Olimpico-a inkhelah minute rukna lekah goal kan hmu. Chelsea striker hlui Tammy Abraham siamsak chu Manchester United defender hlui Smalling-a'n a tauh lut a, assist neitu Abraham hian goal bar a tihper leh bawk.
Second half tir lamah Roma bawk an che fuh, midfielder Jordan Veretout siamsak chu Ibanez-a'n an goal hnih nan a khung ve thung. Hun tawp dawnah substitute Felix Afena-Gyan chu yellow card pahnihna vangin hnawhchhuah a ni a, result erawh a tidanglam tawh lo.
Result a ṭha
AS Roma Jose Mourinho chu an result neihah a lawm a, a naute khelh dan erawhin a lung a la tiawi hran lo. Hmasawn an la ngai nasa hle tih a hmu chiang a, nasa lehzual zawkin an bei chhunzawm ang.
Mourinho chuan, "Match khelh hma ni khan minute 25 chhung set piece kan zir a, chu chu a takin kan chhawr ṭangkai. Corner aṭanga goal hnih kan khung thei kha a lawmawm, inkhel harsa taka point thum kan hmu hi a ṭha.
"Chutih rualin a tir aṭangin buaina kan nei nghal, ball kan hloh hnem bakah player ṭhenkhat khan inrintawkna an nei tlem tih a lang," a ti. Thlasik chawlh an hman hmain Atalanta leh Sampdoria te an la hmachhawn leh ang.
Inven theih a ni
Spezia coach Thiago Motta chuan, "Corner aṭangin goal hnih kan chhuah, kan goal chhuah pahnih kha uluk taka kan en let a nih chuan ven theih a ni tih a lang. Tharum hmangin na takin min bei a, kan inveng thei viau, a pawi erawh ven theih reng chunga goal kan chhuah kha a ni," a ti.
Serie A match 17 an khelh tawhah Spezia hian point 12 chauh an la hmu a, relegation zone aṭangin an him chiah chiah - an hnuaia awm Genoa aia an sanna chu point hnih chiah a ni thung, inkhel pakhat lekah an dinhmun a la inthlak thei reng.
Motta chuan, "Insiamṭhat nan chuan nakin nghah chi a ni lo, tun hun hi a pawimawh lai ber chu a ni. Season chanve kan hmang thleng dawn a, kan thlen chin chu kan hre vek, chuvangin hmasawn kan ngai tih inhrilh nawn a ngai," a ti.